दादरमधील स्विमिंग पूलमध्ये पाच वर्षांपूर्वी दोन अल्पवयीन मुलींवर लैंगिक छळ केल्याची माहिती आहे. याप्रकरणी मुंबईतील एका न्यायालयाने ३० वर्षीय व्यक्तीला दोषी ठरवत तीन वर्षांचा सश्रम कारावास सुनावला आहे. विशेष न्यायाधीश बी.आर. गारे यांनी हा निकाल देताना आरोपीच्या कृतींवर कठोर शब्दात नाराजी व्यक्त केली.

६ मार्च २०२० रोजी घडलेल्या या घटनेत १३ आणि १२ वर्षांच्या दोन मुलींवर आरोपीने पोहत असताना लैंगिक अत्याचार केला होता. त्यातील १३ वर्षीय मुलीला तिच्या पोहण्याच्या पोशाखात एका पुरुषाचा हात गुप्तांगांवर लागल्याचे जाणवले. घाबरलेल्या त्या मुलीने तातडीने आपली व्यथा एका महिला प्रशिक्षक आणि जीवरक्षकाला सांगितली. त्यानंतर मुलीच्या पालकांना बोलावण्यात आले. त्याच वेळी १२ वर्षीय दुसऱ्या मुलीनेही पुढे येऊन सांगितले की त्याच व्यक्तीने तिच्याशीही अशा प्रकारे अयोग्य वर्तन केले होते. या धक्कादायक खुलास्यानंतर पहिल्या मुलीच्या वडिलांनी दुसऱ्याच दिवशी दादर पोलीस ठाण्यात तक्रार दाखल केली.

आरोपीला अटक करून तपास सुरू करण्यात आला. मात्र त्याने न्यायालयात आपली निर्दोषत्वाची बाजू मांडताना असा दावा केला की स्विमिंग पूलमध्ये जवळपास तीस लोक होते आणि त्यामध्ये त्याची चुकीची ओळख पटली. तक्रार नोंदवण्यात एका दिवसाचा विलंब का झाला. यावरूनही त्याने शंका निर्माण करण्याचा प्रयत्न केला. तसेच स्विमिंग पूलमध्ये सीसीटीव्ही फुटेज उपलब्ध नसल्याचा मुद्दाही त्याने आपल्यासाठी बचावाचा आधार म्हणून मांडला.

तथापि, सरकारी वकिलांनी दोन अल्पवयीन मुलींसह आठ महत्त्वाच्या साक्षीदारांची साक्ष नोंदवून आरोपीविरुद्ध ठोस पुरावे सादर केले. न्यायालयाने मुलींच्या साक्षींवर विश्वास ठेवला आणि त्या मनापासून व प्रामाणिकपणे दिल्याचे मान्य केले. मुलींनी आरोपीला त्या दिवशी स्विमिंग पूलमध्ये थेट ओळखल्याचे आणि नंतर न्यायालयात देखील स्पष्टपणे त्याची ओळख पटवल्याचे महत्त्वाचे ठरले. याशिवाय एफआयआर नोंदवण्यात झालेल्या विलंबाबाबत न्यायालयाने तपास अधिकाऱ्यांचे स्पष्टीकरण स्वीकारले. न्यायाधीशांनी नमूद केले की पीडित मुली त्या घटनेमुळे अत्यंत घाबरलेल्या आणि व्यथित होत्या, त्यामुळे तक्रार लगेच दाखल न होणं हे नैसर्गिक आणि समाधानकारक कारण आहे.

निकाल देताना न्यायाधीश गारे यांनी ठाम शब्दांत म्हटले की आरोपीने लैंगिक हेतूने अल्पवयीन मुलींच्या शरीरावर अयोग्य स्पर्श केला आणि त्यांचे वारंवार छळाचे कृत्य केले. त्यामुळे त्याच्यावर लैंगिक अत्याचार आणि लैंगिक छळाचे दोष सिद्ध होतात. या सर्वांकडे लक्ष देऊन न्यायालयाने त्याला तीन वर्षांचा सश्रम कारावास सुनावला आहे. या निर्णयामुळे अल्पवयीन मुलींवर होणाऱ्या लैंगिक छळाच्या प्रकरणांबाबत न्यायपालिका किती कठोर भूमिका घेते हे अधोरेखित झाले असून, अशा कृत्यांविरोधात समाजात एक ठोस संदेश गेला आहे.