संजय गडदे

Mumbai Crime News : मुंबईच्या मालाड येथील मालवण परिसरात दोन गटात हाणामारी झाल्याची घटना घडली आहे. मुंबईच्या मालवणी परिसरातील बुद्ध नगर कच्च्या रस्त्यावर आज भर दिवसा सायंकाळी साडेपाचच्या सुमारास हा प्रकार घडला आहे. दोन गटांमध्ये तुफान राडा झाल्याने परिसरात दहशतीचे वातावरण निर्माण झाले आहे. या घटनेने मालाडमध्ये एकच नागरिकांकडून कायदा सुव्यवस्थेचा प्रश्न उपस्थित करण्यात येत आहे. या हाणामारीचा व्हिडिओ सोशल मीडियावर व्हायरल झाला आहे. (Latest Marathi News)

मिळालेल्या माहितीनुसार, मालवणी बुद्ध नगर कच्च्या रस्त्यावर राहणारे एका टोळीतील काही जणांचे काही दिवसापूर्वी चारकोप परिसरात राहणाऱ्या एका गटात सोबत जोरदार भांडण झाले होते. याच भांडणाच्या रागातून चारकोप परिसरामध्ये राहणाऱ्या गटाने आज, रविवारी सायंकाळी साडेपाच वाजण्याच्या सुमारास मालवणी परिसरामध्ये तलवार घेऊन या गटातील काही लोकांवर हल्ला केला.

तुफान हाणामारीमध्ये एकमेकांवर तलवारीने हल्ले करण्यात आल्याने दोन जण जखमी झाले आहेत. घटनेची माहिती मिळताच मालवणी पोलिसांनी घटनास्थळावर जाऊन चारकोप परिसरामधील काही जणांना ताब्यात देखील घेतलं आहे. या दोन्ही गटाचा हाणामारीचा व्हिडिओ सोशल मीडियावर व्हायरल झाला आहे.

या व्हिडिओमध्ये भररस्त्यात तरुणांच्या हातात तलवारी दिसत आहे. या दोन गटाचे लोक रस्त्यावर आल्यामुळे ट्रॅफिक देखील झाल्याची पाहायला मिळत आहे. तसेच काही महिला देखील भांडण सोडवण्यास आल्याचे व्हिडिओमध्ये दिसत आहे. मात्र, मुंबईसारख्या शहरात दिवसा अशा प्रकारे तलवारीने हल्ला झाल्यामुळे नागरिकांमध्ये भीतीचे वातावरण पसरले आहे. भररस्त्यात दोन गटात तुफान राडा झाल्याने कायदा सुव्यवस्थेचा प्रश्न उपस्थित करण्यात येत आहे.