Mumbai : मुंबईतील चेंबूरमधून एक धक्कादायक घटना उघडकीस आली आहे. खंडणी देण्यास नकार दिल्याने एका ४४ वर्षीय बॅडमिंटन कोचवर जीवघेणा हल्ला करण्यात आला. शरीरावर अनेक वार झाल्याने पीडित व्यक्तीला सायन रुग्णालयात नेण्यात आले. आरोपींना पकडण्यासाठी पोलिसांनी शोधमोहिम सुरु केली आहे.

मिळालेल्या माहितीनुसार, चेंबूरच्या प्रबुद्धनगरमधील बाबासाहेब एसआरए इमारतीजवळ काल (३ ऑगस्ट) रात्री उशिरा ही घटना घडली. बॅडमिंटन कोच प्रफुल्ल घटविसावे हे घराबाहेर एका मित्रासोबत गप्पा मारत होते तेव्हा तिघांनी प्रफुल्ल यांच्यावर हल्ला केला. आरोपींनी प्रफुल्ल यांच्या हातातील सोन्याचे ब्रेसलेट हिसकावून घेतले.

आरोपींनी स्वत:ची ओळख सनी गँगचे सदस्य अशी करुन दिली. तिघांनी प्रफुल्ल घटविसवे यांच्याकडे खोलीच्या भाड्यातून दर आठवड्याला १००० रुपये खंडणी म्हणून देण्याची मागणी केली. पैसे देण्यास नकार दिल्याने आरोपींनी सोन्याचे ब्रेसलेट हिसकावत प्रफुल्ल यांच्यावर जीवघेणा हल्ला केला. भांडणाच्या वेळी तुटलेल्या बिअरच्या बाटलीने प्रफुल्ल यांच्या पोटावर अनेक वार करण्यात आले.

हल्ला केल्यानंतर तिन्ही आरोपी पळून गेले. या घटनेनंतर पोलिसांनी सनी भोसले (३०), सनी बुचुडे (३२) आणि विकास खेत्रे (२८) या तिघांवर आयपीसी कलम ३०७ (खूनाचा प्रयत्न), ३८६ (खंडणी) आणि भारतीय दंड संहितेच्या इतर संबंधित कलमांखाली एफआयआर दाखल केला आहे. तिन्ही फरार आरोपींना शोध सुरु असल्याचे पोलिसांनी सांगितले आहे.