बीकेसीमधील वाहतूक कोंडीचा प्रश्न सोडवण्यासाठी कुर्ला रेल्वे स्थानक आणि वांद्रे रेल्वे स्थानकावरून पॉड टॅक्सी सेवा सुरु करण्यात येणार आहे. या प्रकल्पाचे मुख्यमंत्री देवेंद्र फडणवीस आणि उपमुख्यमंत्री एकनाथ शिंदे यांच्या हस्ते भूमी पूजन कऱण्यात येणार आहे. पॉड टॅक्सी सेवेमुळे प्रवाशांचा प्रवास जलद होणार आहे. याचा सर्वात मोठा फायदा नोकरदारवर्गाला होणार आहे.

वाढत्या शहरीकरणामुळे प्रवाशांना वाहतूक कोडींचा सामना करावा लागत आहे. यामुळे कामाच्या ठिकाणी पोहचण्यासाठी नोकरदार वर्गाला त्रास सहन करावा लागतो. यावरती उपाय म्हणून प्रवाशांच्या सेवेत आता पॉड टॅक्सी येणार आहे. 'पॉड टॅक्सी' ड्राइवर शिवाय चालणार वाहन आहे. या टॅक्सीमध्ये एका वेळी ८ प्रवासी बसून आणि १३ उभे राहून प्रवास करू शकतात. या पॉड टॅक्सी सेवेचे आज मुख्यमंत्री देवेंद्र फडणवीस यांच्या हस्ते भूमी पूजन कऱण्यात येणार आहे. यावेळेस उपमुख्यमंत्री एकनाथ शिंदे यांच्यासह अनेक नेतेमंडळी उपस्थित राहणार आहेत.

आज पॉड टॅक्सीसोबत काशीगाव आणि दहिसर दरम्यान मेट्रो लाईन ९ आणि डायमंड गार्डनर ते मंडाले मेट्रो ३ या लाईन्सच्या पहिल्या टप्प्याचे उद्घाटन होणार आहे. मेट्रो ९ ही मुंबई मेट्रो प्रकल्पातील महत्त्वाची लाईन आहे. ही लाईन मेट्रो 7 ला जोडली असल्याने प्रवाशांना आता थेट अंधेरीपर्यंत जाता येणार आहे. मुंबई महानगर प्रदेश विकास प्राधिकरणाने (एमएमआरडीए) मेट्रो मार्गिका सुरू करण्याची तयारी पूर्ण केली असून आता गुंदवली ते काशिगाव दरम्यान थेट प्रवास शक्य होणार आहे. त्यामुळे प्रवाशांसाठी हा मोठा दिलासा ठरणार आहे.