अंधेरी पश्चिम येथून मोठी बातमी समोर येत आहे. माजी उपमहापौर आणि भाजप नेते अरूण देव यांच्या घरात फटाक्यांमुळे आग लागली. रॉकेट थेट अरूण देव यांच्या बाल्कनीत घुसला. रॉकेट थेट बेडरूमच्या बाल्कनीत आदळला. रॉकेटमुळे एसी युनिटला आग लागली. दरम्यान, सुरक्षा रक्षक आणि शेजाऱ्यांच्या तत्परतेमुळे मोठे नुकसान टळले.

अंधेरी पश्चिम येथील प्रथमेश हाऊसिंग को - ऑपरेटिव्ह सोसायटीमध्ये भाजप नेते अरूण देव यांच्या बी/ ११०२ या फ्लॅटमध्ये मध्यरात्री फटाक्याच्या रॉकेटमुळे भीषण आग लागली. रॉकेट थेट बेडरूमच्या बाल्कनीत घुसले. यामुळे एसी युनिटला आग लागली. एसी युनिट जळून खाक झाले. मात्र, सुरक्षा रक्षक आणि शेजाऱ्यांच्या तत्परतेमुळे मोठी दुर्घटना टळली.

या घटनेनंतर अरूण देव यांनी सोसायटी परिसरात फटाक्यांच्या वापराबाबत कठोर नियमांची गरज असल्याचं सांगितलं. धोकायदायक फटाक्यांचा वापर बंद करण्यात यावा. तसेच रात्री साडे दहा नंतर फटाके फोडण्यास सक्त मनाई असावी, अशी यावेळी त्यांनी विनंती केली आहे.

तसेच नियमांचे पालन सुनिश्चित करण्यासाठी सोसायटीत अधिकृत अधिकारी नेमावा आणि नियमांचे उल्लंघन करणाऱ्यांवर कठोर कारवाई करण्यात यावी, यासाठी ते आज मुख्यमंत्री देवेंद्र फडणवीस यांना पत्र लिहून संबंधित मागणी सादर करणार असल्याचं त्यांनी स्पष्ट केलं.