मध्य रेल्वेने प्रवास करणाऱ्यांसाठी महत्त्वाची बातमी आहे. मध्य रेल्वेवर ९ नोव्हेंबर म्हणजेच रविवारी मेगा ब्लॉक असणार आहे. त्यामुळे जर तुम्ही रविवारी ट्रेनने प्रवास करणार असाल तर रेल्वेचं वेळापत्रक वाचून जा. मध्य रेल्वे मुंबई विभागामार्फत अभियांत्रिकी आणि देखभालीच्या कामांसाठी उपनगरीय विभागात मेगा ब्लॉक घेण्यात येणार आहे. हा मेगा ब्लॉक कुठून कुठपर्यंत असणार आहे ते जाणून घ्या.

कोणत्या मार्गावर मेगा ब्लॉक (Railway Mega Block on Sunday 9th November)

माटुंगा ते मुलुंड दरम्यान अप आणि डाऊन जलद मार्गावर सकाळी ११.०५ वाजेपासून १५.४५ वाजेपर्यंत मेगा ब्लॉक असणार आहे.तर

छत्रपती शिवाजी महाराज टर्मिनस मुंबई येथून सकाळी १०.३६ वाजल्यापासून ते १५.१० वाजेपर्यंत सुटणाऱ्या डाउन जलद मार्गावरील गाड्या माटुंगा स्थानकात डाउन धीम्या मार्गावर वळविण्यात येतील. या गाड्या माटुंगा ते मुलुंड दरम्यान त्यांच्या निर्धारित थांब्यांवर थांबणार आहे.याचसोबत ट्रेन १५ मिनिटे उशिरा पोहोचतील. ठाण्यापलीकडे जाणाऱ्या जलद गाड्या मुलुंड स्थानकात पुन्हा डाउन जलद मार्गावर वळवण्यात येतील.

ठाणे येथून सकाळी ११.०३ वाजल्यापासून ते १५.३८ वाजेपर्यंत सुटणाऱ्या अप जलद मार्गावरील गाड्या मुलुंड स्थानकात अप धीम्या मार्गावर वळविण्यात येतील. या गाड्या मुलुंड ते माटुंगा दरम्यान त्यांच्या निर्धारित थांब्यांवर थांबतील आणि माटुंगा स्थानकात पुन्हा अप जलद मार्गावर वळविण्यात येतील. या ट्रेनदेखील १५ मिनिटे उशिराने पोहचतील.

हार्बर मार्गावरही मेगा ब्लॉक (Harbour Line Mega Block)

कुर्ला आणि वाशी स्थानकांदरम्यान अप व डाउन हार्बर मार्गावर ११.१० ते १६.१० या वेळेत ब्लॉक राहील. छत्रपती शिवाजी महाराज टर्मिनस, मुंबई येथून १०.३४ ते १५.३६ या वेळेत सुटणाऱ्या वाशी/बेलापूर/पनवेलकडे जाणाऱ्या डाउन हार्बर मार्गावरील गाड्या तसेच पनवेल/बेलापूर/वाशी येथून १०.१७ ते १५.४७ या वेळेत छत्रपती शिवाजी महाराज टर्मिनस, मुंबईकडे येणाऱ्या अप हार्बर मार्गावरील गाड्या रद्द राहतील.

मेगा ब्लॉकच्या कालावधीत छत्रपती शिवाजी महाराज टर्मिनस, मुंबई – कुर्ला तसेच पनवेल – वाशी या विभागांदरम्यान विशेष उपनगरी गाड्या चालवल्या जातील. ब्लॉक कालावधीत १०.०० ते १८.०० या वेळेत हार्बर मार्गावरील प्रवाशांना ठाणे–वाशी/नेरुळ दरम्यान प्रवास करता येणार आहे.