पनवेलमधील तोंडरे गावातील एका यादीतील एका व्यक्तीला तब्बल 268 मुले असल्याचा खुलासा मनसे प्रवक्ते योगेश चिले यांनी केला आहे. सर्व 268 मुले हे एकाच घरात वास्तव्यास असल्याची नोंद सुद्धा या मतदार यादीमध्ये करण्यात आल्याचे समोर आलं आहे. यावरून मनसेने तीव्र संताप व्यक्त करत निवडणूक अधिकाऱ्यांना इशारा दिला आहे. ज्या बीएलओंने या मतदारयादीवर काम केलं, त्यांच्यावर काय कारवाई करण्यात येणार का? असा सवालच मनसे प्रवक्ते योगेश चिले यांनी अधिकाऱ्यांना विचारलाय. बोगस मतदार जर का मतदान केंद्रावर आले तर त्यांना मनसे स्टाइल चोप देण्यात येणार, असा इशाराही त्यांनी दिला. यामुळे आता निवडणूक आयोगाच्या या भोंगळ कारभारावर अनेक प्रश्न उपस्थित करण्यात येत आहेत.

२६८ मतदारांचा एकच बाप असल्याचा मतदार यादीतील घोळ समोर आलाय. ही यादी पनवेल महापालिकेच्या हद्दीतील प्रभाग क्रमांक दोनमधील असल्याचं सांगण्यात येत आहे. हे मतदार उत्तर प्रदेश आणि मध्यप्रदेशमधील तरुण असल्याचे सांगण्यात येतंय. ही मुले हरीश नावाच्या व्यक्तीची असल्याचेही योगेश चिले यांनी सांगितलं. या प्रभागात तब्बल दो हजारांहून अधिक बोगस मतदारांची नोंद करण्यात आल्याचाही दावा मनसे प्रवक्ते चिले यांनी केलाय. पनवेलमध्ये मतदार यादीत एकाच बापाची 265 हून अधिक मुले… नक्की कोण धृतराष्ट्र झाले आहे? बाप की निवडणुक आयोग असा सवाल त्यांनी केला.

मतदार यादी नंबर 47, 48 आणि 50 मध्ये हा संपूर्ण घोळ आहे. मतदार यादी क्रमांक 183 आणि 184 मधील मतदार हे पनवेलमध्ये अस्तित्वात नसलेल्या इमारतीतील रहिवासी दाखवण्यात आले आहेत. ज्या घरात 268 लोकांची नोंद झालीये, त्या घरात आणखी 40 ते 50 इतर लोकांची नावे देखील नोंदवल्याची धक्कादायक माहिती समोर आलीये.

268 लोकांपैकी केवळ 8 ते 10 मराठी नावे आहेत. बाकीचे मतदार उत्तर प्रदेश आणि मध्य प्रदेशातील आहेत, असा खळबळजनक प्रकार पनवेलमध्ये उघडकीस आला आहे.