संघर्ष गांगुर्डे, कल्याण प्रतिनिधी

कल्याण आंबिवली परिसरातील काळू नदीत सुरू असलेल्या बेकायदेशीर रेती उपशाचा धक्कादायक व्हिडिओ सोशल मीडियावर जोरदार वायरल होत आहे. दिवसा हा उपसा होत असल्याने सर्वांच्या भुवया उचलल्या आहेत.मोठ्या प्रमाणात रेती चोरट्यांकडून मशीनरीच्या मदतीने रेती उपसा सुरू असल्याचे दिसत असून परिसरातील नागरिकांत तीव्र नाराजी व्यक्त होत आहे.

स्थानिकांच्या म्हणण्यानुसार, रेती माफियांची दहशत वाढत असून दिवसाढवळ्या देखील रेती वाहतूक करणाऱ्या वाहनांची रेलचेल सुरू आहे. यामुळे नदीकाठाचे पर्यावरणीय संतुलन धोक्यात येत असून काळू नदीच्या खोलीत व वहनक्षमतेत घट होत असल्याची भीती तज्ज्ञांनी व्यक्त केली आहे.

सर्वात धक्कादायक म्हणजे हा व्हिडिओ वायरल झाल्यानंतरही स्थानिक प्रशासन, महसूल विभाग व पोलीस यांची कारवाई मात्र दिसत नसल्याने नागरिकांनी प्रश्नचिन्ह उभे केले आहे. अधिकाऱ्यांच्या डोळ्यासमोरच रेती माफिया उधळण करत आहेत, तरीही कारवाई नाही. हे नेमकं कुणाच्या आशीर्वादाने चालतंय? असा सवाल स्थानिक नागरिकांनी उपस्थित केला आहे.

दरम्यान, वाढत्या बेकायदेशीर रेती उपशामुळं नदीकाठच्या गावांना पूरपरिस्थितीचा धोका निर्माण होऊ शकतो, असा इशाराही पर्यावरणप्रेमी संघटनांनी दिला आहे.नागरिकांनी संबंधित विभागांनी तातडीने या प्रकरणाची दखल घेऊन रेती माफियांवर कठोर कारवाई करावी, अशी जोरदार मागणी केली आहे.