अंबरनाथ : अंबरनाथमध्ये काही दिवसांपूर्वी धावती लोकल पकडताना तरुणाचा अपघात झाल्याची घटना घडली होती. लोकल आणि प्लॅटफॉर्मच्या मधोमध तरुण प्रवासी अडकला होता. अपघातात तरुण गंभीर जखमी होता. या घटनेनंतर प्रवाशाला तातडीने रुग्णालयात दाखल केलं होतं. मात्र, आज शनिवारी तरुणाचा उपचारादरम्यान मृत्यू झाला आहे. तरुणाच्या मृत्यूने रेल्वे अपघातातील मृतांच्या संख्येत आणखी भर पडली आहे.

लोकलमध्ये जागा मिळवण्यासाठी धावती लोकल पकडणं अंबरनाथच्या एका प्रवाशाला चांगलंच महागात पडलं आहे. प्रवाशाचा तोल जाऊन प्लॅटफॉर्म आणि लोकलच्यामध्ये मधोमध अडकला होता. यात हा प्रवासी गंभीर जखमी झाला होता. अखेर या रेल्वे प्रवाशाचा मृत्यू झाला आहे. या प्रवाशाचं नाव रोहित बच्चूलाल यादव असे आहे. रोहित हा 35 वर्षांचा होता.

उल्हासनगरच्या सिताराम नगर येथे राहण्यास होता. नोकरीला जाण्यासाठी शुक्रवारी सकाळी अंबरनाथ रेल्वे स्थानकात सकाळी ७ वाजून ५१ मिनिटांनी सीएसएमटीसाठी रोहित धावत्या लोकलमध्ये चढायला गेला. मात्र लोकल वेगात असल्याने त्याचा तोल गेला. लोकलमध्ये चढता न आल्याने तो घसरून थेट प्लॅटफॉर्म आणि लोकलच्या गॅपमध्ये जाऊन पडला. त्यानंतर त्याच्यावरून २ ते ३ डबे पुढे गेले. या अपघातात रोहित गंभीर जखमी झाला.

रोहितला आरपीएफने बाहेर काढत उल्हासनगरच्या मध्यवर्ती रुग्णालयात दाखल केलं. मात्र अखेर त्याचा आज मृत्यू झाला. लोकल ट्रेनमध्ये जागा पकडण्यासाठी प्रवासी करत असलेली घाई कशी जीवावर बेतू शकते, हे या निमित्ताने पुढे आलं आहे. रोहितच्या मृत्यूने उल्हासनगरमधील सितारामनगर परिसरात हळहळ व्यक्त केली जात आहे.