Best Bus Accident Mumbai Kurla : कुर्ल्यामध्ये बेस्ट बस नव्हे तर सोमवारी संध्याकाळी बसच्या रूपाने यमदूतच आला होता. एरवी सामान्यांना घेऊन जाणारी बेस्टची बस रस्त्यावर असलेल्या रिक्षा, दुचाकीसह चालणाऱ्याना लोकांना चिरडत गेल्याचे चित्र अनेकांना सुन्न करणारे होते. कुर्ल्यामध्ये सोमवारी रात्री बेस्ट बसचा भीषण अपघात झाला. ब्रेक फेल झाल्यामुळे हा अपघात झाल्याचं बोलले जातेय. या भीषण अपघातामध्ये पाच जणांचा मृत्यू झालाय. तर ३१ जण गंभीर जखमी झाले आहेत. अचानक झालेल्या या जीवघेण्या अपघाताने कुर्ला पश्चिम येथील आंबेडकर नगरच्या रस्त्यावर स्मशान शांतता पसरली होती.

आरोपी बेस्ट चालकाला ताब्यात घेण्यात आले आहे. अपघात कसा घडला याबाबत त्याच्याकडे चौकशी सुरु आहे. याशिवाय प्रत्यक्षदर्शींचा जबाब नोंदवला जाणार आहे. अपघात घडल्यानंतर जखमींना वैद्यकीय मदत मिळवून देणे ही प्राथमिकता होती. घटनास्थळावरील परिस्थिती नियंत्रणात असून बंदोबस्त ठेवण्यात आला आहे, अशी प्रतिक्रिया सह पोलीस आयुक्त ( कायदा व सुव्यवस्था) सत्यनारायण चौधरी यांनी दिली.

५ जणांनी जीव गमावला -

कुर्ला येथील बेस्ट बस अपघातात आतापर्यंत ५ जणांचा मृत्यू झालाय. तर जखमी ३१ जणांवर विविध रुग्णालयात उपचार सुरू आहेत. 1)विजय विष्णू गायकवाड(७०) 2)आफ्रीन अब्दुल सलीम शहा(१९) 3)अनम शेख(२०) 4)कणीस फातिमा गुलाम कादरी(५५) 5)शिवम कश्यप(१८) अशी मृतांची नावे आहेत. या अपघातात गस्तीवर असलेले चार पोलिस आणि एमएसएफ जवान ही जखमी झाले आहेत. यातील पीएसआय प्रशांत चव्हाण या जखमी अधिकाऱ्याच्या फिर्यादीवर पोलिसांनी गुन्हा दाखल केला असून पुढील कारवाई कुर्ला पोलीस करीत आहे.

बस चालकाला ठोकल्या बेड्या, गुन्हा दाखल -

सोमवारी रात्री जेव्हा हा अपघात घडला तेव्हा, अपघातग्रस्त बस मध्ये तब्बल ६० प्रवासी असल्याचे पोलिसांनी सांगितले. या प्रकरणी बस चालक संजय मोरे(५४) या बस चालकाला पोलिसांनी अटक केली असून त्याच्यावर सदोष मनुष्य वधाचा गुन्हा दाखल करण्यात आला आहे. या अपघातात गस्तीवर असलेले चार पोलिस आणि एमएसएफ जवान ही जखमी झाले आहेत. यातील पीएसआय प्रशांत चव्हाण या जखमी अधिकाऱ्याच्या फिर्यादीवर पोलिसांनी गुन्हा दाखल केला असून पुढील कारवाई कुर्ला पोलीस करीत आहे.