राज्यात किमान तापमानात सतत चढ उतार होत असल्याने राज्यात थंडी कमी -अधिक होत आहे. अनेक ठिकाणी अद्यापही पारा १० अंशांच्या खाली असल्याने थंडीचा कडाका अनुभवायला मिळत आहे. आज देखील किमान तापमानात चढ-उतार होत असून गारठा कायम राहण्याची शक्यता हवामान विभागाने वर्तविली आहे.

काल म्हणजेच रविवारी परभणीत ६.८ अंश सेल्सिअस तापमानाची नोंद झाली. धुळ्यात ७ अंश सेल्सिअस, अहिल्यानगर येथे ७.५ अंश सेल्सिअस, निफाड येथे ७.६ अंश सेल्सिअस, परभणी येथे ७.५ अंश सेल्सिअस तापमान नोंदले गेले. गोंदिया येथे ९ अंश, तर भंडारा आणि ‎नागपूर येथे १० अंशांपेक्षा कमी तापमानाची नोंद झाली.

यंदा हिवाळा लांबणार असल्याचे संकेत हवामान खात्याने दिले आहे उत्तरेकडील राज्यात बर्फवृष्टी सुरू असल्याने थंड वारे दक्षिणेकडे वाहू लागले आहे त्यामुळे जानेवारी महिन्यात थंडीचा कडाका वाढणार असल्याचा अंदाज वर्तविण्यात येत असून यवतमाळ जिल्ह्यात थंडीचा जोर कायम असून १०.४ अंश तापमानाची नोंद झाली आहे. थंडीचा जोर असल्याने दिवसभर उबदार कपडे घालून घराबाहेर पडावे लागत आहे.रात्री आठ नंतर गारठा वाढत असल्याने ग्रामीण शहरातील बाजारपेठेतील शुकशुकाट पाहायला मिळत आहे.

राज्यात काल निफाड, धुळे, अहिल्यानगर, परभणी येथे थंडीचा कडाका टिकून होता. पहाटेच्या वेळी धुके आणि दव पडल्याचे दिसून आले. उर्वरित राज्याच्या किमान तापमानातील वाढ कायम असली तरी गारठा कायम होता. आज राज्यातील कमाल आणि किमान तापमानात चढ-उतार कायम राहणार असून, थंडी टिकून राहण्याचा अंदाज हवामान विभागाने वर्तविला आहे.