राज्यात श्रावण सरींचा लपंडाव पाहायला मिळतो आहे. भारतीय हवामान विभागाच्या अंदाजानुसार आज पूर्व विदर्भातील नागपूर, भंडारा आणि गोंदिया जिल्ह्यांत काही ठिकाणी पावसाच्या जोरदार सरी कोसळण्याचा अंदाज हवामान विभागाने व्यक्त केला आहे. या पार्श्वभूमीवर या जिल्ह्यांना येलो अलर्ट देण्यात आला असून नागरिकांनी सतर्क राहण्याचे आवाहन करण्यात आले आहे.

पूर्व विदर्भात गेल्या काही दिवसांपासून पावसाचे वातावरण कायम आहे. आजही आकाश ढगाळ राहण्याची शक्यता असून, काही भागांत जोरदार सरींची शक्यता आहे. विशेषतः नागपूर, भंडारा आणि गोंदिया जिल्ह्यांतील काही ठिकाणी पावसाचा जोर वाढू शकतो.

तसेच मराठवाड्यातील हिंगोली, लातूर आणि नांदेड जिल्ह्यांत तुरळक ठिकाणी विजांच्या कडकडाटासह पाऊस पडण्याची शक्यता आहे. उर्वरित राज्यातही ढगाळ वातावरण राहण्याची शक्यता असून, ऊन-सावल्यांचा खेळ सुरू राहणार आहे. काही ठिकाणी हलक्या सरी पडण्याचा अंदाज आहे. दरम्यान, पश्चिम बंगाल आणि बांगलादेशाच्या किनाऱ्यालगत समुद्रसपाटीपासून सुमारे ७.६ किलोमीटर उंचीवर चक्राकार वाऱ्यांची स्थिती निर्माण झाली आहे. या प्रणालीच्या प्रभावामुळे आज पश्चिम बंगाल आणि ओडिशाच्या किनारपट्टीजवळ कमी दाबाचे क्षेत्र तयार होण्याची शक्यता आहे.

ईशान्य उत्तर प्रदेशात सध्या कमी दाबाचे क्षेत्र सक्रिय आहे. या प्रणालीला लागून समुद्रसपाटीपासून सुमारे ४.५ किलोमीटर उंचीवर चक्राकार वाऱ्यांची स्थिती आहे. मात्र, ही हवामान प्रणाली हळूहळू निवळून जाण्याची शक्यता हवामान विभागाने व्यक्त केली आहे. एकंदरीत, राज्यात पावसाचे वातावरण कायम राहणार असून, विदर्भातील काही जिल्ह्यांमध्ये आज पावसाचा जोर अधिक राहण्याची शक्यता आहे.