Road Accidents Latest News: मागील काही महिन्यांपासून राज्यातील रस्ते अपघातात मोठी वाढ झाली आहे. वाढते अपघात आणि त्यातून होणारी जीवितहानी ही चिंता वाढवणारी आहे. वाहनचालकांच्या बेजबाबदारपणाने रस्ते अपघात होत असून अनेकांना आपला जीव लागत असल्याची माहिती डॉ. रवींद्र सिंघल (अतिरिक्त पोलीस महासंचालक, वाहतूक) यांनी दिली आहे. पुण्यातही अपघातांचं प्रमाण वाढलं असून गेल्या ७ महिन्यातील आकडेवारी धडकी भरवणारी आहे. (Latest Marathi News)

पोलिसांनी (Police) दिलेल्या माहितीनुसार, जानेवारी ते जुलै २०२३ या कालावधीत राज्यात एकूण १९,७१९ अपघात झाले असून या अपघात ८,९०७ जणांचा मृत्यू झाला आहे. मुंबईत होणाऱ्या अपघातांचं प्रमाण घटलं असून पुण्यातील प्रमाण वाढलं आहे. पुण्यात गेल्या वर्षीच्या तुलनेत यंदा अपघात व मृत्यू वाढले आहेत.

गेल्या वर्षी जानेवारी ते जुलै या सात महिन्यांत ४९४ अपघातात (Accident) १८९ लोकांचा मृत्यू झाला तर ३५२ जण जखमी झाले होते. यंदा सात महिन्यात ७०५ अपघातांत २०५ मृत्यू तर ५०२ जण जखमी झाले. तर मुंबईत रस्ते अपघातात घट झाल्याचं दिसून येत आहे. गेल्या ७ महिन्यांमध्ये मुंबईत ५५१ अपघात झाले असून या अपघातात १४८ जणांचा मृत्यू झाला.

गेल्यावर्षीच्या तुलनेत यामध्ये ५९० नी घट झाली आहे. सध्याच्या घडीला राज्यात ३ कोटी ४७ लाख ७३ हजार ६२५ वाहनांची नोंदणी झालेली आहे. देशात रस्ते अपघातात महाराष्ट्र तिसऱ्या क्रमांकावर असून हे अपघात कमी करण्यासाठी परिवहन विभागासह वाहतूक पोलीस विविध उपाययोजना राबवित आहेत.

रस्ते अपघातांच्या कारणांमध्ये आयुर्मान पूर्ण झालेल्या गाड्यांतून प्रवासी वाहतूक करणे, वेगाने वाहन चालवणे, क्षमतेपेक्षा जास्त प्रवासी गाडीत बसविणे, गाडी चालवताना मोबाइलचा वापर करणे, पुरेशी विश्रांती न घेता वाहन चालवणे ही कारणे आहेत. अपघात आणि त्यातून होणारी मनुष्यबळाची हानी फार गंभीर आहे, अशी खंत डॉ. रवींद्र सिंघल यांनी व्यक्त केली आहे.

Edited by - Satish Daud