रोहिदास घाडगे, पुणे प्रतिनिधी, साम टीव्ही मराठी

Pune Junnar ST bus Accident death News : पुणे जिल्ह्यातील जुन्नर तालुक्यात रात्रीच्या वेळी एक भीषण अपघाताची घटना घडली. अहिल्यानगर-कल्याण महामार्गावरील आळेफाटा परिसरात एसटी बसने दुचाकीला जोरदार धडक दिली. ही धडक इतकी भीषण होती की, दुचाकीवरील चारही जणांचा जागीच मृत्यू झाला. या दुर्दैवी घटनेमुळे परिसरात हळहळ व्यक्त केली जात आहे. अपघातानंतर महामार्गावरील वाहतूक ठप्प झाली होती. पोलिसांनी अपघातग्रस्त वाहने बाजूला केल्यानंतर वाहतूक सुरळीत झाली आहे. (ST bus hits motorcycle in Junnar, four killed )

मिळालेल्या प्राथमिक माहितीनुसार, कल्याणहून आळेफाट्याकडे जाणाऱ्या एसटी बसने दुचाकीला धडक दिली. अपघातानंतर घटनास्थळी स्थानिक नागरिकांनी मोठी गर्दी केली होती. नागरिक आणि पोलिसांनी तातडीने मदतकार्य सुरू करत मृतदेह ताब्यात घेतले. या अपघातामुळे महामार्गावर काही काळ मोठी वाहतूक कोंडी निर्माण झाली होती, मात्र पोलिसांनी तत्परता दाखवत वाहतूक पूर्ववत केली.

मृतांची ओळख पटवण्याचे काम सध्या सुरू असल्याची माहिती मिळतेय. या अपघातामधील मृत सर्वजण एकाच कुटुंबातील किंवा मित्रपरिवारातील असावेत, असा प्राथमिक अंदाज आहे. अपघात नेमका कोणत्या कारणामुळे झाला? याचा तपास पोलिसांकडून केला जात आहे. या भीषण दुर्घटनेमुळे जुन्नर तालुक्यावर शोककळा पसरली असून, महामार्गावरील वाढत्या अपघातांबाबत नागरिकांमधून चिंता व्यक्त केली जात आहे.