मुंबई : साऱ्या राज्याचं लक्ष लागलेल्या बारामती मतदारसंघांमध्ये दररोज नाट्यमय घडामोडी घडत आहेत. काका आणि पुतण्याच्या रोज नवनवीन विधानांनी ही निवडणूक गाजतेय. काका अजित पवार विरुद्ध पुतण्या युगेंद्र पवार यांच्यामधील या लढतीमुळे पवार कुटुंबातला राजकीय संघर्ष शिगेला पोहचलाय.

लोकसभेला शरद पवारांनी घातलेली भावनिक साद बारामतीकरांना भावली. त्यामुळे आता विधानसभेला अजित पवारांनीही वेगवेगळ्या माध्यमातून बारामतीकरांना भावनिक साद घलण्याचा सिलसिला सुरू ठेवलाय. आता तर थेट दादांनी साहेबांना सोडलेलं नसल्याचं मोठं विधान केलंय.

केवळ विकास कामांना स्थगिती दिल्यामुळेच आपण सरकारमध्ये सामील झाल्याचा दादांचा दावा मात्र ताईंनी फेटाळून लावलाय. हातातल्या बांगड्यांना ईडी सीबीआयची भीती नाही असा टोला त्यांनी लगावलाय.

गेल्या काही दिवसांत अजित पवारांनी कोणती मोठी विधानं केली आहेत ते पाहुयात

मी शरद पवारांना सोडलेलं नाही, सर्व आमदारांचं मत होतं सरकारमध्ये जावं

काकींना आताच कसा नातवाचा पुळका आला?

हा पठ्ठ्याच तुमची कामं करणार, बारामतीत आपलं नाणं खणखणीत

शरद पवारांनंतर बारामतीचा वाली मीच

लोकसभेला गंमत केलीत आता गंमत करू नका

शरद पवारांनी संसदीय राजकारणातून निवृत्तीचे संकेत दिल्यानंतर बारामतीत भावनिक राजकारणाचा महापूर आलाय. त्यामुळे आता काकांना शह देण्यासाठी अजितदादांनीही बारामतीच्या गावागावांमध्ये आपल्या पद्धतीनं भावनिक मुद्दे बाहेर काढलंय. त्यामुळे विधानसभेला बारामतीकर कुणाच्या भावनांना प्रतिसाद देणार याची उत्सुकता वाढलीय.