Summary -

• मतदानाआधीच भाजपचा मोठा राजकीय धडाका

• डोंबिवलीत भाजपचे ७ उमेदवार बिनविरोध विजयी

• पनवेल महानगरपालिकेत भाजपचे ५ उमेदवार विजयी

• विरोधी उमेदवारांनी अर्ज माघारी घेतल्यामुळे भाजपला यश

राज्यात महानगर पालिका निवडणुकीच्या रणधुमाळीदरम्यान भाजपचा धडाका सुरूच आहे. मतदानाआधीच भाजपचे एकापाठोपाठ एक उमेदवार बिनविरोध निवडून येताना दिसत आहेत. कल्याण- डोंबिवली महापालिकेच्या निवडणुकीत भाजपचा सातवा उमेदवार बिनविरोध विजयी झाला आहे. तर पनवेल महानगर पालिकेमध्ये आतापर्यंत भाजपचे ५ उमेदवार मतदानापूर्वीच विजयी झाले आहेत.

मिळालेल्या माहितीनुसार, पनवेल महापालिका निवडणुकीतील भाजपचे ५ नगरसेवक बिनविरोध निवडून येण्याच्या मार्गावर आहेत. चार उमेदवारांच्या समोरील महाविकास आघाडीच्या उमेदवारांनी अर्ज माघारी घेतले. त्यामुळे पनवेल महानगर पालिकेमध्ये भाजपचे नितीन पाटील, रुचिता लोंढे, अजय बहिरा आणि दर्शना भोईर हे निवडणुकीपूर्वीच नगरसेवक झालेत. तर काही मिनिटांपूर्वी पाली शिंदे यांनी पोलिस बंदोबस्तात उमेदवारी अर्ज माघारी घेतल्यामुळे प्रभाग क्रमांक २० मधील उमेदवार कांडपिळे बिनविरोध होण्याच्या मार्गावर आहेत.

तर दुसरीकडे, कल्याण-डोंबिवली महानगर पालिकेमध्ये भाजपचा सातवा उमेदवार बिनविरोध निवडून आला आहे. मनसेचे मनोज घरत यांनी माघार घेतल्याने कल्याण- डोंबिवली महापालिकेच्या निवडणुकीत भाजपचा सातवा उमेदवार बिनविरोध निवडून आला. डोंबिवली प्रभाग क्रमांक '२७ ड'मधील महेश पाटील बिनविरोध निवडून आलेत. आज छाननी आणि अर्ज मागे घेण्याचा शेवटच्या दिवशी आतापर्यंत भाजपचे ७ तर एकनाथ शिंदे यांच्या शिवसेना पक्षातील ४ उमेदवार असे एकूण ११ उमेदवार बिनविरोध विजय झालेले आहे.