संजय गडदे, साम प्रतिनिधी

राज्यातील २९ महापालिकांसाठी आज मतदानाला सकाळपासूनच सुरुवात झाली. मात्र बोगस मतदान, मतदान यंत्रातील बिघाड, बोटावरील शाई पुसणे, दुसऱ्याच व्यक्तीने मतदान करुन जाणे यांसह अनेक गैरप्रकार समोर आलेत. कांदिवलीमधील प्रभाग क्रमांक येथे एक धक्कादायक प्रकार उघडकीस आलाय. मतदारांची नावे शोधण्यासाठी थेट पक्षाच्या अधिकृत उमेदवाराचे अॅप वापरले जात असल्याचा प्रकार समोर आलाय.

मतदानावेळी गंभीर प्रकार उघडकीस येत असल्यानं विरोधी पक्षातील नेत्यांकडून टीका केली जातेय. स्थानिक मतदान केंद्रावर थेट व्हिडिओ बनवून ते गैरप्रकार उघडकीस आणत आहेत. दरम्यान पुणे, सोलापूर, मुंबई आणि जालन्यासह काही ठिकाणी बोगस मतदार पकडल्याच्या घटना समोर आल्या आहेत.तर कांदिवलीमधील प्रभाग क्रमांक २९ मध्ये निवडणूक अधिकारीच भाजपचे चिन्ह दाखवून मतदारांना भाजपच्या उमेदवाराला मतदान करण्यास सांगत असल्याचा प्रकार उघडकीस आलाय.

निवडणूक प्रक्रिया पूर्णपणे निष्पक्ष व तटस्थ असणे अपेक्षित असताना, एका विशिष्ट राजकीय पक्षाच्या अ‍ॅपचा वापर होत असल्याने निवडणूक आचारसंहितेचे उल्लंघन झाल्याचा गंभीर आरोप करण्यात येत आहे. कांदिवली येथील एका मतदान केंद्रावर नेमलेले निवडणूक अधिकारी मतदारांची नावे शोधण्यासाठी भाजपच्या अ‍ॅपचा वापर करत असल्याचा व्हिडिओ ठाकरे गट आणि मनसेचे उमेदवारानं शेअर केलाय.

या घटनेमुळे स्थानिक मतदारांमध्ये तीव्र संतापाची भावना व्यक्त होत असून, या प्रकरणाची निवडणूक आयोगाने तात्काळ दखल घेऊन सखोल चौकशी करावी व दोषींवर कठोर कारवाई करावी, अशी जोरदार मागणी करण्यात येत आहे. ठाकरे गट आणि मनसेच्या उमदेवारानं शेअर केलेल्या व्हिडिओमध्ये एक निवडणूक अधिकारी महिलेचे नाव राऊत आहे.

मुंबई महानगरपालिकेनं मतदारांची नावे शोधण्यासाठी जे अधिकारी नेमले आहेत, ते भाजपचा मोबाईल अॅप वापरत आहेत. विशेष म्हणजे मुंबई महापालिकेचे मतदारांची नावे शोधण्यासाठी एक स्वतंत्र अॅप आहे. तरीही निवडणूक अधिकारी या भादपंच अॅप वापरत आहेत. हे अॅप वापरत असताना निवडणूक अधिकारी मतदारांना भाजपचे चिन्ह दाखवत आहेत. भाजपच्या उमेदवाराला मत देण्यास सांगत असल्याचा आरोप ठाकरे गटाच्या उमेदवाराने केला आहे.