ठाणे-घोडबंदर मार्गावरील गायमुख ते फाउंटन हॉटेल भुयारी मार्ग आणि फाउंटन हॉटेल ते भाईंदर उन्नत पूल प्रकल्पाला सरकारनं मंजुरी दिली आहे. हे दोन्ही प्रकल्प पूर्ण झाल्यानंतर पश्चिम मुंबई, ठाणे, कल्याण-डोंबिवली, नाशिक आणि गुजरातकडे जाणारा प्रवास अधिक जलद होणार असल्याचा दावा मुख्यमंत्री देवेंद्र फडणवीस यांनी व्यक्त केला. ठाणे-घोडबंदर मार्गावरील हॉटेल भुयारी मार्ग आणि फाउंटन हॉटेल ते भाईंदर उन्नत पुलामुळे वाहतूक कोंडीचा प्रश्न सुटणार आहे.

राज्य मंत्रिमंडळाच्या बैठकीत सरकारनं हा निर्णय घेतला आहे. मंत्रिमंडळाच्या बैठकीत बैठकीत तब्बल २२ हजार ६११ कोटी रुपयांच्या विविध प्रस्तावांना मंजुरी देण्यात आली आहे. या बैठकीला उपमुख्यमंत्री एकनाथ शिंदे, उपमुख्यमंत्री सुनेत्रा अजित पवार, महसूलमंत्री चंद्रशेखर बावनकुळे, वैद्यकीय शिक्षणमंत्री हसन मुश्रीफ, उद्योगमंत्री डॉ. उदय सामंत तसेच वरिष्ठ अधिकारी उपस्थित होते.

या प्रकल्पांतर्गत गायमुख ते फाउंटन हॉटेल दरम्यान ५.८६ किलोमीटर लांबीचा सहा पदरी भुयारी मार्ग उभारण्यात येणार आहे. तर फाउंटन हॉटेल ते भाईंदर दरम्यान ९.५८ किलोमीटर लांबीचा सहा पदरी उन्नत पूल उभारण्यात येणार आहे. भुयारी मार्गाचे बांधकाम अत्याधुनिक टीबीएम तंत्रज्ञानाच्या साहाय्याने करण्यात येणार आहे.

याचा व्यास १४ मीटर असणार आहे. दरम्यान पुढील पाच वर्षांत हा प्रकल्प पूर्ण करण्याचे नियोजन करण्यात आलंय. हा महत्त्वाकांक्षी प्रकल्प सार्वजनिक-खासगी भागीदारीच्या ‘बांधा-वापरा-हस्तांतरित करा’ (बीओटी) तत्त्वावर राबविण्यात येईल. यासह सिडकोच्या नवी मुंबई मेट्रो मार्ग १ए (सागर संगम ते सीबीडी बेलापूर) आणि मेट्रो मार्ग २ (पेंधर ते नवी मुंबई आंतरराष्ट्रीय विमानतळ टी-४) विस्तार प्रकल्पांनाही मंजुरी देण्यात आली आहे. या निर्णयामुळे सागर संगम ते नवी मुंबई आंतरराष्ट्रीय विमानतळ असा २८ किलोमीटरचा मेट्रो मार्ग उभारण्यात येणार आहे. या विस्तारामध्ये मार्ग १ए वर दोन तर मार्ग २ वर ११ स्थानकांचा समावेश आहे.