रुपाली बडवे, साम टीव्ही, प्रतिनिधी

विधानसभा निवडणूक जाहीर होताच सगळ्याच राजकीय आघाड्यांच्या जागावाटपाच्या चर्चांना गती आली आहे. यातच महाविकास आघाडीची मुंबईतील जागांसंदर्भात हॉटेल सोफिटल येथे बैठक पार पडली. या बैठकीत मुंबईतील 90 टक्के जागांवर मविआची चर्चा पूर्ण झाल्याची माहिती सूत्रांनी दिली आहे.

ठाकरे गट सर्वाधिक जागा लढवणार?

मुंबईच्या 36 विधानसभा जागांवर महाविकास आघाडीत गेल्या अनेक दिवसांपासून तिढा होता. मात्र हा तिढा आता सुटला आहे, अशी माहिती सूत्रांनी दिली आहे. सूत्रांनी सांगितलं की, महाविकास आघाडीच्या जागा वाटपात मुंबईतील जागांमध्ये शिवसेना ठाकरे गटच मोठा पक्ष असणार आहे. शिवसेना ठाकरे गटाच्या वाट्याला मुंबईत अधिक जागा महाविकास आघाडीमध्ये येणार आहे.

पहिली यादी कधी होणार जाहीर?

आज झालेल्या मुंबईच्या जागावाटपाच्या बैठकीत 36 पैकी 33 जागांवर महाविकास आघाडीतील नेत्यांचा एक मत झाल्याचं सूत्रांनी सांगितलं. तसेच येत्या दोन- तीन दिवसात जागावाटप आणि काँग्रेसची पहिली उमेदवारांची यादी जाहीर होणार, अशी माहितीही सूत्रांनी दिली आहे.

मुंबईत कोणाचे किती आमदार?

मिळालेल्या माहितीनुसार, मुंबईतील 36 जागांवर सर्वाधिक संख्या भाजप आमदारांची आहे. मुंबईत भाजपचे 16 आमदार आहेत. तर शिवसेना फुटीनंतर ठाकरे गटाचे गटाकडे 8 आमदार आहेत, तर शिंदे गटाकडे 6 आमदार आहेत. तसेच काँग्रेसचे 4 आमदार असून अजित पवार गटाचा 1 आणि समाजवादी पक्षाचा 1 आमदार मुंबईत आहेत.

दरम्यान, काँग्रेसची याआधी कधी जाहीर होणार याचे उत्तर स्वतः विधानसभेचे विरोधी पक्ष नेते विजय वडेट्टीवार यांनी दिलं आहे. ते म्हणाले आहेत की, ''२० तारखेला केंद्रीय निवडणूक समितीची बैठक आहे. त्यावेळी संध्याकाळी यादी येणे अपेक्षित आहे. मोठा भाऊ लहान भाऊमध्ये आम्हाला अडकवू नका. दोन दिवसात चित्र स्पष्ट होईल.'', असं ते म्हणाले आहेत.