सचिन जाधव, पुणे

विद्यार्थ्यांसाठी महत्त्वाची बातमी समोर आली आहे. राज्यस्तरीय पात्रता परीक्षा (SET) पुढे ढकलण्यात आली आहे. महाराष्ट्र लोकसेवा आयोगाच्या (MPSC ) परीक्षा आणि आषाढी वारीच्या पार्श्वभूमीवर विद्यार्थ्यांकडून परीक्षा पुढे ढकलण्याची मागणी करण्यात आली होती. २६ जुलै रोजी आयोजित करण्यात आलेली ४१ वी सेट परीक्षा आता ६ सप्टेंबर रोजी होणार असल्याची माहिती प्रशासनाकडून देण्यात आली आहे.

महाराष्ट्र आणि गोवा राज्यातील विद्यापीठे तसेच वरिष्ठ महाविद्यालयांमध्ये सहाय्यक प्राध्यापक पदासाठी पात्रता निश्चित करणारी सेट परीक्षा सावित्रीबाई फुले पुणे विद्यापीठामार्फत आयोजित केली जाते. विद्यापीठातील सेट परीक्षा विभाग हा राज्य सरकारची नोडल एजन्सी म्हणून कार्यरत असून UGC मार्गदर्शक तत्त्वांनुसार ही परीक्षा घेण्याचे अधिकार त्यांच्याकडे आहेत. यंदाची ४१ वी सेट परीक्षा २६ जुलै रोजी घेण्याचे नियोजन करण्यात आले होते. मात्र, त्याच दिवशी महाराष्ट्र लोकसेवा आयोगामार्फत विविध विषयांच्या भरतीसाठीच्या परीक्षा आयोजित करण्यात आल्या आहेत. त्यामुळे अनेक विद्यार्थ्यांना दोन्ही परीक्षांपैकी एकाच परीक्षेला उपस्थित राहता येणार होते.

या परिस्थितीत विद्यार्थ्यांचे शैक्षणिक आणि व्यावसायिक नुकसान होण्याची शक्यता व्यक्त करण्यात आली होती. याशिवाय, ७ जुलै ते २५ जुलै या कालावधीत आषाढी वारी असल्याने राज्यातील अनेक भागांत वाहतुकीवर परिणाम होण्याची शक्यता होती. वारीमुळे रस्ते वाहतूक, सार्वजनिक परिवहन व्यवस्था आणि परीक्षार्थ्यांच्या प्रवासावर परिणाम होऊ शकतो, अशी चिंता विद्यार्थ्यांनी व्यक्त केली होती. त्यामुळे परीक्षा केंद्रांपर्यंत वेळेत पोहोचण्यात अडचणी निर्माण होण्याची शक्यता लक्षात घेऊन विद्यार्थ्यांनी परीक्षा पुढे ढकलण्याची मागणी केली होती.

विद्यार्थ्यांनी केलेल्या मागणीचा विचार करून परीक्षा पुढे ढकलण्याचा निर्णय घेण्यात आला आहे. या निर्णयामुळे एमपीएससी आणि सेट या दोन्ही परीक्षांची तयारी करणाऱ्या विद्यार्थ्यांना दिलासा मिळाला असला, तरी सेट परीक्षेची प्रतीक्षा आणखी वाढली आहे. आता ६ सप्टेंबर रोजी होणाऱ्या परीक्षेसाठी विद्यार्थ्यांना अतिरिक्त वेळ मिळणार असून तयारी अधिक भक्कम करण्याची संधी उपलब्ध झाली आहे.