गोपाल मोटघरे, पिंपरी चिंचवड, प्रतिनिधी

Mugdha Deshmukh Suicide Case : लंडन येथे एमबीएच्या शिक्षणासाठी गेलेल्या छत्रपती संभाजीनगर येथील ३४ वर्षीय मुग्धा अविनाश देशमुख या तरुणीचा मृतदेह पिंपरी-चिंचवडजवळील गहुंजे येथील 'लोढा बेलमोंडो' या आलिशान सोसायटीतील एका बंद फ्लॅटमध्ये कुजलेल्या अवस्थेत आढळून आल्याने खळबळ उडाली आहे. क्रेडिट कार्ड व्यवहारांमुळे तिचा भारतातील ठावठिकाणा समोर आला. मृत्यूचे कारण अद्याप अस्पष्ट असून पोलिसांकडून तपास सुरू आहे.

जुलै २०२५ मध्ये लंडनला गेलेली मुग्धा दररोज घरच्यांशी संपर्कात होती. मात्र, २३ ऑक्टोबर २०२६ रोजी आईशी शेवटचे बोलणे झाल्यानंतर तिचा संपर्क तुटला. कुटुंबीयांनी लंडन येथील तिच्या मैत्रिणीमार्फत चौकशी केली असता, तिने ऑगस्टच्या शेवटीच लंडन सोडल्याची धक्कादायक माहिती समोर आली. भारतीय उच्चायुक्तांकडून कोणताही प्रतिसाद न मिळाल्याने पालकांनी मुग्धाच्या बँक खात्यांचे व्यवहार तपासले. त्यात भारतातील झोमॅटो, ब्लिंकिट आणि स्विगीसारख्या ॲप्सवर तिचे क्रेडिट कार्ड वापरले गेल्याचे उघड झाले.

ती भारतातच असल्याचे निश्चित झाल्यावर पालकांनी छत्रपती संभाजीनगरमधील उस्मानपुरा पोलीस ठाण्यात अपहरणाची तक्रार नोंदवली. पोलिसांच्या तांत्रिक तपासात तिचे लोकेशन गहुंजे येथील सोसायटीत आढळले. तेथे बनावट चावीच्या साह्याने फ्लॅट उघडला असता तिचा मृतदेह सापडला. शवविच्छेदन अहवाल आणि मोबाईलच्या तांत्रिक विश्लेषणानंतरच तिच्या मृत्यूचे खरे कारण स्पष्ट होईल, अशी माहिती शिरगाव पोलीस ठाण्याचे वरिष्ठ पोलीस निरीक्षक देवेंद्र चव्हाण यांनी दिली आहे. शिरगाव पोलीस सर्व शक्यता गृहीत धरून या प्रकरणाचा पुढील तपास करत आहेत.