Mumbai News :

आगामी लोकसभा निवडणुकीसाठीच्या (2024 Loksabha Election) जागावाटपावरुन राज्यात सर्वच पक्षांना तारेवरची कसरत करावी लागणार आहे. महाविकास आघाडीचा फॉर्म्युला ठरलाय अशी चर्चा काही दिवसांपूर्वी होती.

मात्र महाविकास आघाडीचा (Mahavikas Aghadi) जागावाटपाचा तिढा वाढत चालला आहे. या पार्श्वभूमीवर काँग्रेसने राज्यातील ४८ मतदारसंघातून इच्छूक उमेदवारांची नावे मागितली आहे. त्यामुळे काँग्रेस लोकसभा निवडणुकीत 'एकला चलो रे'ची भूमिका घेणार का? अशी चर्चा रंगू लागली आहे.  (साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)

येत्या १० जानेवारीपर्यंत इच्छूकांची नावे काँग्रेसने मागवली आहे. महाविकास आघाडीतील जागावाटपाचा तिढा अद्याप सुटत नसल्याने काँग्रेसने ही भूमिका घेतल्याचं बोललं जात आहे. असं करुन काँग्रेसने महाविकास आघाडीतील मित्र पक्षांचं टेन्शन वाढवलं आहे. मात्र काँग्रेसची ही स्वबळाची तयारी आहे की दबावतंत्र आहे अशा चर्चा आता सुरु झाल्या आहेत.

काँग्रेसच्या बैठकीत चर्चा

काल म्हणजेच ४ जानेवारी रोजी काँग्रेसची महत्त्वाची बैठक पार पडली. लोकसभा निवडणुका आणि त्याआधीच काढण्यात येणाऱ्या भारत न्याय यात्रेसाठी पक्षाने केलेल्या तयारीवर काँग्रेसच्या बैठकीत चर्चा झाली. तसेच यावेळी संसदेतील खासदारांच्या निलंबनाच्या मुद्द्यावरही चर्चा झाली.

लोकसभा निवडणुकीसाठी महाराष्ट्रातील जागावाटपाच्या मुद्द्यावरही कालच्या बैठकीत प्राथमिक चर्चा झाली. काँग्रेसचे नेते बाळासाहेब थोरात, प्रदेशाध्यक्ष नाना पटोले आणि पक्षाचे राष्ट्रीय अध्यक्ष मल्लिकार्जुन खरगे यांच्यात ही चर्चा झाल्याची माहिती आहे.