सागर आव्हाड, साम टीव्ही प्रतिनिधी

पुणे जिल्ह्यातील 'लाडक्या बहिणीं' ना 'ई-केवायसी' केल्यानंतरही अनुदानाचा लाभ मिळत नसल्याने त्या सव्वादोन लाख बहिणींची थेट पडताळणी होणार आहे. मात्र, आत्तापर्यंत जिल्ह्यातील १,२०१ पुरुष लाभार्थी लाभ घेत असल्याची धक्कादायक माहिती पुढे आली असून त्यामध्ये सर्वाधिक हवेली, पुण्यातील ४८७ पुरुष लाभार्थ्यांचा समावेश आहे. आता 'ई-केवायसी' झालेल्या लाभार्थ्यांसह ते खरोखरच पुरुष लाभार्थी आहेत का याचाही शोध घेण्यात येणार आहे.

केवायसी करण्याचे आदेश

राज्यात 'लाडक्या बहिणीं'ना देण्यात येणाऱ्या दीड हजार रुपयांच्या अनुदानापासून अनेक बहिणी वंचित आहेत. सरकारने या लाभार्थी महिलांना ई-केवायसी करण्याच्या सूचना दिल्या होत्या. ही प्रक्रिया करताना अनेक अडचणी आल्या होत्या. अर्ज दाखल केल्यानंतरही या महिलांना अनुदान सुरू झाले नाही. ज्यांच्या घरी चारचाकी आहेत त्यांना अनुदान सुरू राहिले. मात्र, ज्यांच्या घरी चारचाकी नाही, सरकारी नोकरी नाही किंवा पेन्शनही नाही अशा लाभार्थ्यांचे अनुदान बंद झाले. अनेक लाभार्थी महिलांनी तक्रारी केल्याने त्यांची दखल घेत महिला व बाल विकास विभागाने ई-केवायसी करण्याचे आदेश दिले आहेत.

प्रशासनाला शोध घेण्याचा आदेश

पुणे जिल्ह्यात लाडकी बहीण योजनेचे सुमारे वीस लाख लाभार्थी आहेत. त्यापैकी राज्य सरकारला पुरुषांची नावे असलेली काही लाभार्थी आढळलेले आहेत. लाडकी बहीण योजनेचा महिलांप्रमाणे पुरुषही लाभ घेत असल्याची शंका उपस्थित करण्यात आली आहे. त्या पुरुष लाभार्थ्यांची पुन्हा पडताळणी करण्याचे आदेश दिले.

लाभार्थ्यांची खातरजमा करण्याचे सरकारने ठरवले आहे. त्याबाबत संबंधित जिल्ह्यातील प्रशासनाला पुरुष लाभार्थ्यांचा शोध घेण्याचा आदेश दिला आहे. पुणे जिल्ह्यात १,२०१ पुरुष लाभार्थी आढळले. त्यामध्ये हवेली आणि पुणे तालुक्यात सर्वाधिक ४८७ लाभार्थी आढळले आहेत.

सरकारी नोकरदार असेल किंवा पेन्शनधारक कोणी असेल तर त्या कुटुंबातील लाभार्थी ही अपात्र ठरणार आहे. त्या दोन्ही पैकी कोणीही घरात नसेल किंवा त्याचे लाभार्थी नसतील तर ती महिला योजनेची लाभार्थी ठरेल. त्यानुसार जिल्ह्यात आता दोन लाख २५ हजार ३६० लाभार्थी महिलांची पडताळणी करण्यात येणार आहे.