संघर्ष गांगुर्डे, साम टीव्ही

कल्याणमध्ये दिवाळीच्या दिवशीच दुर्दैवी घटना घडली आहे. कल्याण पश्चिममधील अनुपम नगरमध्ये घरावर झाड कोसळलं. या अपघातात घरांचं नुकसान झालंय. या घटनेत दोघे जखमी झाले आहेत.

कल्याण पश्चिमेतील अनुपम नगर परिसरात दिवाळीच्या संध्याकाळी मुसळधार पावसासह सोसाट्याच्या वाऱ्यामुळे मोठं झाड कोसळलं. या घटनेत एकूण तीन घरांचे मोठे नुकसान झालं. या घटनेत दोन जण जखमी झाल्याची माहिती समोर आली आहे. त्यांना उपचारासाठी तातडीने रुग्णालयात दाखल करण्यात आल.

सायंकाळनंतर सुरू झालेल्या जोरदार पाऊस आणि वाऱ्यामुळे झाड अचानक घरांवर कोसळलं. झाडाच्या फांद्यांखाली घरांचा मोठा भाग चिरडला गेला. या घटनेत घरातील सामानाचेही मोठे नुकसान झालं. स्थानिकांनी तत्काळ अग्निशामक दलाला माहिती दिल्यानंतर जवानांनी घटनास्थळी धाव घेतली. त्यानंतर झाडाचा रस्ता अडवलेला भाग हटवला.

पावसामुळे कल्याणच्या परिसरातील वीजपुरवठा खंडित झाला आहे. अग्निशामक दलाच्या अधिकाऱ्यांनी सांगितले की, घरावर पडलेले झाड बाजूला करण्याचे काम सुरू आहे. या घटनेनंतर परिसरात भीतीचे वातावरण आहे. तीन कुटुंबांचे घर उद्ध्वस्त झाल्याने ते अक्षरशः रस्त्यावर आले आहेत.दिवाळीच्या दिवशीच घर उद्ध्वस्त झाल्याने परिसरातील नागरिकांत हळहळ व्यक्त केली जात आहे. स्थानिक प्रशासन आणि केडीएमसी च्या आपत्कालीन पथकांकडून घटनास्थळाची पाहणी सुरू आहे. पीडित कुटुंबांना तात्पुरती निवासव्यवस्था उपलब्ध करून देण्याचे प्रयत्न सुरू आहेत.

ऐन दिवाळीत कल्याणमध्ये पावसाचा धुमाकूळ

दिवाळीच्या उत्सवादरम्यान अचानक हवामानात बदल झाल्याने कल्याण-डोंबिवलीत मुसळधार पाऊस कोसळला. कल्याण परिसरात विजेच्या कडकडाटासह मंगळवारी संध्याकाळपासून जोरदार पाऊस सुरू झाला. दिवाळीच्या आनंदात अचानक आलेल्या या पावसाने नागरिकांची तारांबळ उडाली. यामुळे कल्याण शहरातील अनेक भागांमध्ये वीजपुरवठा खंडित झाला आहे. वीजपुरवठा खंडीत झाल्याने घरांमध्ये दिवाळी साजरी करण्याच्या योजना विस्कटल्या आहेत.