संघर्ष गांगुर्डे, साम टिव्ही

कल्याण पूर्वेतील मलंग रोड, चेतना परिसरातून एक धक्कदायक घटना उघडकीस आली आहे. मध्यरात्री उशिरा एक तरूण कोयता घेऊन धिंगाणा घालत होता. हातात कोयता आणि इतर धारदार शस्त्र घेऊन हा तरुण परिसरातील वाहनांना अडवत होता. अचानक समोर उभा राहत तो वाहनचालकांना धमकावत होता. याचा व्हिडिओही समोर आले आहेत. या व्हिडिओतून तरूण कोयता घेऊन धिंगाणा घालत असल्याचं स्पष्ट दिसत आहे. हा व्हिडिओ सोशल मीडियात मोठ्या प्रमाणावर व्हायरल झाला आहे.

मिळालेल्या माहितीनुसार, ही घटना कल्याण पूर्वेतील मलंग रोड चेतना परिसरातून उघडकीस आली आहे. मध्यरात्री उशिरा एक तरूण हातात कोयता घेऊन दहशत माजवत होता. घटनेच्यावेळी तरूण कोयता घेऊन रस्त्यावर फिरत होता. तसेच दुचाकी आणि चारचाकी वाहनचालकांना कोयता दाखवून भीती दाखवत होता. तसेच तरूणाने मोठ्या आवाजात आरडाओरड करत दहशत निर्माण केली. अचानक घडलेल्या या प्रकारामुळे चेतना परिसरातील नागरिकांत भीतीचे वातावरण निर्माण झाले आहे.

या प्रकरानंतर स्थानिकांनी पोलीस ठाण्यात धाव घेतली. तसेच घटनेबाबत माहिती दिली. पोलिसांना माहिती मिळताच त्यांनी घटनास्थळी धाव घेतली. तसेच व्हिडीओच्या आधारे संबंधित तरुणाची ओळख पटवण्याचे काम सुरू केले. तरूण नेमक्या कोणत्या कारणामुळे शस्त्रासह रस्त्यावर फिरत होता? याचा तपास पोलिसांकडून सुरू आहे.

सध्या पोलिसांकडून सीसीटीव्ही फुटेजही तपासले जात आहे. या घटनेनंतर मलंग रोड परिसरातील सुरक्षेबाबत नागरिकांनी पोलिसांनी गस्त वाढवावी, अशी मागणी केली आहे. या घटनेनंतर परिसरात खळबळ उडाली असून, पुढील तपास पोलिसांकडून सुरू आहे.