संघर्ष गांगुर्डे, कल्याण

कल्याण रेल्वे स्टेशन परिसरात अधिकृत फेरी व्यवसाय करणाऱ्या एका फेरीवाल्याला अनधिकृत फेरीवाल्याने धमकावत बेदम मारहाण केल्याची धक्कादायक घटना समोर आली आहे. या घटनेमुळे रेल्वे परिसरातील अनधिकृत फेरीवाल्यांची दादागिरी पुन्हा एकदा चर्चेत आली असून प्रवासी आणि अधिकृत फेरीवाल्यांमध्ये संतापाचे वातावरण निर्माण झाले आहे. या प्रकरणी कल्याण रेल्वे पोलीस ठाण्यात गुन्हा दाखल करण्यात आला असून पोलिसांकडून आरोपीचा शोध सुरू आहे.

मिळालेल्या माहितीनुसार, शेषराव सीताराम नांगरे हे रेल्वे प्रशासनाची अधिकृत परवानगी घेऊन एक्सप्रेस गाड्यांमध्ये फेरी व्यवसाय करतात. २७ मे रोजी ते नेहमीप्रमाणे कल्याण ते लोणावळा मार्गावरील गाड्यांमध्ये व्यवसायासाठी कल्याण रेल्वे स्टेशनवर आले होते. दुपारी सुमारे १.४५ वाजण्याच्या सुमारास ते मधुराई एक्सप्रेसची वाट पाहत मोठ्या ब्रिज परिसरात उभे होते. त्यावेळी गौरीशंकर दुबे नावाचा इसम त्यांच्या जवळ आला.

तक्रारीनुसार, आरोपीने “आप गाडी में नहीं आना, नहीं तो मैं आपको कर्जत में मारूंगा” अशी धमकी देत शिवीगाळ करण्यास सुरुवात केली. यावेळी शेषराव नांगरे यांनी आपण अधिकृत ओळखपत्र आणि परवानगी घेऊन व्यवसाय करत असल्याचे सांगितले. मात्र, याच गोष्टीचा राग मनात धरून आरोपी गौरीशंकर दुबे याने नांगरे यांच्या अंगावर धाव घेत त्यांच्या डोक्यात बुक्क्यांनी मारहाण केली. या हल्ल्यात नांगरे यांच्या डोक्याला किरकोळ दुखापत झाली. घटनेनंतर आरोपी तेथून पसार झाला. जखमी अवस्थेत नांगरे यांनी तातडीने कल्याण रेल्वे पोलीस ठाण्यात धाव घेत तक्रार दाखल केली.

पोलिसांनी तक्रारीनुसार आरोपीविरोधात गुन्हा दाखल करून पुढील तपास सुरू केला आहे. दरम्यान, रेल्वे स्थानक परिसरात अनधिकृत फेरीवाल्यांची वाढती दादागिरी आणि प्रवाशांना होणारा त्रास याबाबत वारंवार तक्रारी होत आहेत. अधिकृत फेरीवाल्यांनाही अशा प्रकारच्या धमक्या आणि मारहाणीला सामोरे जावे लागत असल्याने रेल्वे प्रशासन आणि पोलिसांनी अनधिकृत फेरीवाल्यांविरोधात कठोर कारवाई करावी, अशी मागणी होत आहे.