कल्याणच्यामधील खासगी रूग्णालयात रिसेप्शनिस्ट म्हणून काम करणाऱ्या मराठी तरूणीला एका परप्रांतीय तरूणानं बेदम मारहाण केली. या संतापजनक घटनेचा अनेकांनी तीव्र निषेध केला. या प्रकरणात मनसैनिकांनी संतप्त प्रतिक्रिया दिली. 'चार तासांत आरोपीला अटक झाली नाही तर, आम्ही आमच्या पद्धतीनं शोधू, चोपू आणि मगच स्वाधीन करू', असं मनसैनिकांनी म्हटलं आहे.

नेमकं प्रकरण काय?

पीडित तरूणी पिसवली गावातील रहिवासी आहे. नांदिवलीतील डॉ. अनिकेत पालांडे यांच्या श्री. बालचिकीत्सालय रूग्णालयात ती रिसेप्शनिस्ट म्हणून काम करीत होती. सोमवारी ती कामावर गेली. त्यावेळी डॉक्टर आलेले नव्हते. तसेच ४ ते ५ पेशंट डॉक्टरची वाट पाहत होते. सायंकाळी डॉक्टर आले. तेव्हा एमआर लोक त्यांना भेटायला आले.

या दरम्यान, एक महिला आणि पुरूष त्यांच्या बाळाला घेऊन आले. त्यांच्यासोबत एक तरूणही आला. तो तरूण त्यांचा नातेवाईक असल्याची माहिती आहे. तो सरळ डॉक्टरांच्या केबिनमध्ये घुसण्याचा प्रयत्न केला. मात्र, रिसेप्शनिस्टनं त्याला अडवलं. त्याला राग अनावर झाला. त्यानं तरूणीला शिवीगाळ करण्यास सुरूवात केली. तसेच लाथाबुक्क्यांनी मारहाण केली.

यावेळी क्लिनीकमधील इतर लोकांनी तिची सुटका केली. हा सर्व प्रकार सीसीटीव्हीत कैद झाला. व्हिडिओ व्हायरल होताच हे प्रकरण समोर आलं. दरम्यान, या प्रकरणाचा मनसैनिकांनी तीव्र निषेध केला आहे. तसेच संतप्त प्रतिक्रिया दिली आहे. 'चार तासांत आरोपीला अटक झाली नाही तर आम्ही आमच्या पद्धतीने शोधू, चोपू आणि मगच पोलिसांच्या स्वाधीन करू'. असं मनसैनिक म्हणाले आहेत.

मनसे पदाधिकाऱ्यांनी संतप्तपणे म्हटलं की, "लहान मुलीला मारून मर्दानगी दाखवायची? मग मनसैनिकांसमोर येऊन दाखव. ही घटना निंदनीय असून, पोलिसांनी तत्काळ कारवाई केली पाहिजे. जनतेनेही अशा गुंडांना पोलिसांच्या स्वाधीन करण्याआधी प्रसाद द्यावा!", असं त्यांनी म्हटलं आहे.