Summary -

• कल्याण-डोंबिवली महापालिका निवडणुकांच्या पार्श्वभूमीवर महायुतीत पुन्हा तणाव निर्माण झाला

• पॅनल २ हा शिवसेनेचा बालेकिल्ला असल्याचा अरविंद मोरे यांचा ठाम दावा

• भाजपने केलेल्या दाव्यावर शिवसेनेने थेट विरोध दर्शवला

• कल्याण-डोंबिवली महापालिकेत दोन्ही पक्षांतील तणाव वाढला

संघर्ष गांगुर्डे, कल्याण

कल्याण -डोंबिवली महापालिका निवडणुकांच्या तोंडावर शिवसेना शिंदे गट आणि भाजपमधील तणाव पुन्हा चव्हाट्यावर आला आहे. कल्याण डोंबिवली निवडणुकीवरून शिंदेसेनेच्या जिल्हाप्रमुखाने पुनः भाजपला डीवचले. 'याठिकाणी महायुतीचे वातावरण असूनही पॅनल क्रमांक २ हा शिवसेनेचा अभेद्य बालेकिल्ला आहे. इथे भाजपला एकही जागा मिळणे शक्य नाही.', असा थेट इशाराच शिवसेना जिल्हा प्रमुख अरविंद मोरे यांनी भाजपला दिला आहे.

शहरातील वाढत्या चर्चांच्या पार्श्वभूमीवर अरविंद मोरे यांनी महापालिका निवडणुका आणि जागावाटपावर भूमिका स्पष्ट करताना भाजपच्या दाव्यावर सवाल उपस्थित केला. त्यांनी सांगितले की, 'पॅनल २ मध्ये गेल्या अनेक वर्षांपासून शिवसेनेची पकड मजबूत आहे. स्थानिक पातळीवर कार्यकर्त्यांनी केलेले काम आणि मतदारांचा विश्वास या पॅनलला आजही सुरक्षित ठेवतो. युती झाली तरी बालेकिल्ल्यावर तडजोड नाही.'

दरम्यान, या विधानामुळे महायुतीतील अंतर्गत समीकरणांवर पुन्हा एकदा प्रश्नचिन्ह निर्माण झाले आहे. शिवसेना नेत्याच्या या वक्तव्यामुळे भाजप आणि शिवसेनेतील तणाव अद्याप संपला नसल्याचे दिसत आहे. यामुळे दोन्ही पक्षातील वाद पुन्हा चव्हाट्यावर आला आहे. भाजप स्थानिक नेतृत्वाकडून अद्याप याबाबत अधिकृत प्रतिक्रिया समोर आलेली नसली तरी पॅनल २ संदर्भातील शिवसेनेची ठाम भूमिका पाहता दोन्ही पक्षांमध्ये तणाव आणखी वाढण्याची चिन्हे आहेत.