संघर्ष गांगुर्डे, साम टीव्ही | कल्याण

BJP Shiv Sena conflict over MNS in KDMC : कल्याण-डोंबिवली महापालिकेत सत्तासंघर्ष चिघळण्याची दाट शक्यता आहे. मनसेवरून शिंदेसेना आणि भाजपमध्ये मिठाचा खडा पडला आहे. मनसेला सत्तेबाहेर काढण्याची मागणी भाजपच्या जिल्हाध्यक्षांनी शिंदेसेनेच्या जिल्हाप्रमुखांकडे पत्राद्वारे केली होती. त्यावर शिंदेसेनेकडूनही प्रत्युत्तर आले होते. त्यानंतर आज उपमहापौरांच्या दालनात भाजप पदाधिकारी आणि आमदार सुलभा गायकवाड यांची बैठक आहे. या बैठकीत नेमकी काय चर्चा होते आणि भाजपकडून कोणता निर्णय घेतला जातोय, याकडं सगळ्यांचं लक्ष लागलं आहे.

कल्याण-डोंबिवली महापालिकेतील (KDMC Mahayuti Politics) महायुतीच्या सत्ताकारणात मनसेच्या भूमिकेवरून भाजप आणि शिवसेना शिंदे गटामध्ये संघर्षाची ठिणगी पडण्याची शक्यता निर्माण झाली आहे. भाजपचे कल्याण जिल्हाध्यक्ष नंदकिशोर परब यांनी काल शिंदेसेनेचे कल्याण जिल्हाप्रमुख गोपाळ लांडगे यांना पत्र दिलं. मनसेला सत्तेतून तात्काळ बाहेर काढण्याची मागणी त्यांनी केली होती.

मनसेबाबत शिवसेनेने (MNS-Shivsena) आपली भूमिका स्पष्ट करावी, असा थेट सवालही या पत्रातून परब यांनी उपस्थित केला होता. महायुतीमध्ये भाजप आणि शिवसेना शिंदेगटाची आघाडी असताना कल्याण-डोंबिवली महापालिकेतील सत्ताकारणात मनसेच्या सहभागावरून भाजपमध्ये नाराजी असल्याचे या पत्रातून स्पष्ट झाले.

मनसेला सत्तेतून बाहेर काढण्याबाबत तातडीने निर्णय न झाल्यास भाजपला स्वतंत्र निर्णय घ्यावा लागेल, असा इशाराही भाजप जिल्हाध्यक्षांनी दिल्याने महायुतीतील अंतर्गत राजकारण तापण्याची शक्यता आहे. आज कल्याण-डोंबिवली महापालिकेतील उपमहापौर दालनात भाजप पदाधिकारी आणि भाजप आमदार सुलभा गायकवाड यांची महत्त्वाची बैठक आहे. या बैठकीत मनसेबाबत भाजपची पुढील भूमिका, महापालिकेतील सत्तासमीकरण आणि शिंदेसेनेसोबतच्या संबंधांवर चर्चा होण्याची शक्यता आहे.