कल्याण-डोंबिवली आणि आसपासच्या परिसरातील प्रवाशांना लोकल ट्रेनने प्रवास करताना अनेक समस्यांना तोंड द्यावे लागते. लोकल प्रवासातील जीवघेणी गर्दी, ट्रेनची रखडपट्टी आणि रोजच्या लेटमार्कमुळे नोकरदार वर्ग त्रस्त झालाय. प्रवाशांच्या या समस्या सोडवण्यासाठी प्रशासन कामाला लागले असून यापार्श्वभूमीवर भाजपचे महाराष्ट्र प्रदेशाध्यक्ष रवींद्र चव्हाण यांनी मध्य रेल्वेचे विभागीय रेल्वे प्रबंधक (डीआरएम) हिरेश मीना यांची भेट घेतली. मध्य रेल्वेच्या सीएसएमटी येथील मुख्यालयात रेल्वे अधिकारी आणि आमदार चव्हाण यांच्यात महत्त्वाची बैठक पार पडली.

गेल्या महिन्यात २६ सप्टेंबर रोजी रेल्वे प्रवासी संघटनांच्या प्रतिनिधींनी आमदार रवींद्र चव्हाण यांची सदिच्छा भेट घेतली होती. यावेळी प्रतिनिधींनी डोंबिवली, दिवा आणि निळजे परिसरातील प्रवाशांना दररोज भेडसावणाऱ्या समस्यांसह त्यांच्या मागण्या मांडल्या होत्या. चाकरमान्यांच्या याच अडचणींची गंभीर दखल घेत आणि त्यावर मार्ग काढण्याच्या उद्देशाने या मुख्यालयातील महत्त्वपूर्ण बैठकीचे आयोजन करण्यात आलं होतं.

या बैठकीदरम्यान प्रवाशांच्या सोयीसाठी अनेक महत्त्वाचे मुद्दे उपस्थित करण्यात आले. गर्दीच्या वेळी निळजे स्थानकातून मुंबईकडे दर तासाला रेल्वे सुरू करण्याची प्रमुख मागणी प्रशासनाकडे करण्यात आली. यासोबतच ऐन गर्दीच्या वेळी प्रवाशांची होणारी प्रचंड कोंडी फोडण्यासाठी डोंबिवली आणि दिवा स्थानकातूनही मुंबईकडे जाणाऱ्या लोकल फेऱ्या सुरू करण्याची मागणी देखी आमदार चव्हाण यांनी केली. तसेच प्रवाशांची सुरक्षा, स्थानकांवरील गर्दीचे योग्य व्यवस्थापन आणि सातत्याने उशिराने धावणाऱ्या लोकल ट्रेनच्या समस्येवरही चर्चा या बैठकीत करण्यात आली.