अभिजित देशमुख

Kalyan News:

कल्याणमध्ये एक खळबळजनक घटना घडलीये. रविवारी मध्य रात्रीच्या सुमारास घराच्या खिडकीतून घरात शिरून एका महिलेवर प्राणघातक हल्ला करण्यात आलाय. कल्याण कोळवली परिसरात ही घटना घडलीये. महिलेच्या गळ्यावर आणि हातावर सपासप वार करुन हल्लेखोर पसार झालाय. (Latest Marathi News)

जखमी महिला सोनम पाल हिच्यावर खाजगी रुग्णालयात उपचार सुरु आहेत. खडकपाडा पोलिसांनी या प्रकरणाचा तपास सुरु केला आहे. मात्र हा हल्ला कशासाठी करण्यात आला याचा उलगडा तपासाअंती होणार आहे.

कल्याण पश्चिमेतील कोलीवली रोड परिसरात वैशाली भोईर चाळ आहे. या चाळित नितेश पाल हा पत्नी सोनमसोबत राहतो. नितेश जवळच्या एका बेकरीत कामाला आहे. रविवारी रात्री तो बेकरीत कामात असताना पत्नी सोनम घरात एकटीच होती. रात्री साडे अकरा वाजताच्या सुमारास सोनम घरात एकटी असताना घराच्या खिडकीतून एक इसम घरात आला.

त्याने सोनमच्या गळ्यावर आणि हातावर धारदार हत्याराने हल्ला केला. या हल्ल्यात सोनम गंभीर जखमी झाली. तिच्यावर रुग्णालयात उपचार सुरु आहेत. घटना घडताच खडकपाडा पोलिस घटनास्थळी दाखल झाले. हल्लेखोर पसार झाला.

डीसीपी सचिन गुंजाळ, एसीपी कल्याणजी घेटे यांच्या मार्गदर्शनाखाली पोलिस अधिकारी सर्जेराव पाटील, शरद जिने आणि अनिल गायकवाड यांनी या प्रकरणाचा तपास सुरु केला आहे. सोनमवर कोणी आणि कशाच्या उद्देशाने हल्ला केला आहे याची माहिती समोर आली नाही. काही दिवसांपूर्वीच सोनम ही तिच्या मूळ गावातून पतीसोबत कल्याणमध्ये राहण्यास आली आहे.