जुन्नर, ता. २५ ऑगस्ट २०२४

राष्ट्रवादी काँग्रेसचे अध्यक्ष शरद पवार आज जुन्नरच्या दौऱ्यावर आहेत. जुन्नरमध्ये मा.आमदार स्व.श्रीकृष्ण रामजी तांबे, मा.आमदार स्व लतानानी श्रीकृष्ण तांबे आणि शिक्षण महर्षी स्व.विलासराव तांबे सर यांच्या अर्धाकृती पुतळ्याचे अनावरण व चैतन्य विद्यालयाच्या नूतन इमारतीचे उ‌दघाटन शरद पवार यांच्या हस्ते पार पडले. या कार्यक्रमाला अजित पवार गटाचे आमदार अतुल बेनके, खासदार अमोल कोल्हे आदी नेते हजर होते. यावेळी बोलताना अतुल बेनके यांनी शरद पवार यांचे तोंडभरुन कौतुक केले.

काय म्हणाले अतुल बेनके?

"आज आदरणीय शरद पवार साहेब कार्यक्रमाला आले. संपूर्ण कुटुंबांने त्यांची भेट घेतली. या भेटीवेळी साहेबांनी शैक्षणिक संस्था, विकामाबद्दल सर्व विचारपूस केली. साहेबांना पुतळ्याचे अनावरण होत असल्याचे माहित होताच ते स्वत: हून इथे आले. साहेब इथ येत आहेत समजताच आनंद झाला, असे अतुल बेनके म्हणाले. तसेच शरद पवारांचे कौतुक करत त्यांचे विचार सोडणार नाही," असा शब्दही अतुल बेनके यांनी दिला.

अमोल कोल्हेंची फटकेबाजी

"५४ वर्षांपूर्वी या भागाचे नेतृत्व करणाऱ्याचा गौरव आज आपण करत आहोत. त्यांच्या पुतळ्यावर पुष्प अर्पण करत आपण त्यांच्यासमोर नतमस्तक होतो. आता ही तत्व ही निष्ठा आजच्या काळात राहिली का हा फार मोठा प्रश्न सध्याच्या महाराष्ट्राच्या राजकारणाकडे बघितलं तर नक्कीच निर्माण होतो," असे म्हणत खासदार अमोल कोल्हे यांनीही जोरदार फटकेबाजीही केली.

जनतेने जागे झाले पाहिजे!

"आमदार अतुल बेनके यांनी बदलापूरच्या दुर्दैवी घटनेचा उल्लेख पण त्यावेळी लोकप्रतिनिधी म्हणून महाराष्ट्र राज्याचे शासन करते काय हा सुद्धा विचार करणे गरजेचे आहे. दहा दिवसात 12 घटना घडतात आणि या बारा घटना माणुसकीला काळीमा फासणाऱ्या घटना घडत असताना काही शासनाच्या योजनांची जाहिरात करण्यामध्ये लोकप्रतिनिधी हे मजबूत राहत असतील तर अशा लोकप्रतिनिधी ना जागा दाखवण्यासाठी जनतेने जागे झाले पाहिजे?" असेही ते म्हणाले.