संजय गडदे, साम टीव्ही

शिवसेनाप्रमुख बाळासाहेब ठाकरे यांचे सुपुत्र जयदेव ठाकरे यांच्या वांद्रे येथील निवासस्थानी सुरक्षारक्षक म्हणून कार्यरत असलेल्या पोलीस शिपायाची बॅग चोरीला गेल्याची घटना उघडकीस आली आहे. बॅग चोरीला गेल्यानंतर वांद्रे रेल्वे पोलिसांनी तातडीने कारवाई केली. या प्रकरणात मुख्य आरोपी आशीष पिंड कश्यप याला अटक केली आहे.

सुषांत जयराम गायकवाड (वय 32) असे तक्रारदार अंगरक्षकाचे नाव आहे. ते नवी मुंबईतील राज्य राखीव पोलीस दलात कार्यरत आहेत. सध्या ते जयदेव ठाकरे यांच्या वांद्रे येथील निवासस्थानी अंगरक्षक म्हणून कर्तव्य बजावत आहेत. 27 फेब्रुवारी रोजी गोरेगाव येथील एसआरपीएफ ग्रुप 8 येथे मासिक गोळीबार सराव पूर्ण करून ते वांद्रे येथे परतले होते.

रात्री उशिरा घरी जाताना शेवटची लोकल सुटल्याने सुषांत गायकवाड वांद्रे रेल्वे स्थानकातील बाकड्यावर झोपले. पहाटे जाग आल्यावर त्यांची बॅग चोरीला गेल्याचे लक्षात आले. या बॅगेत सरकारी पिस्तूल, 29 जिवंत काडतुसे, पोलीस ओळखपत्र, कपडे असा सुमारे 1 लाख 79 हजार रुपयांचा मुद्देमाल होता.

घटनेची माहिती मिळताच वांद्रे रेल्वे पोलिसांनी सीसीटीव्ही फुटेजच्या आधारे तपास सुरू केला. तांत्रिक माहितीच्या आधारे पोलिसांनी आशीष पिंड कश्यप याला ताब्यात घेतले. चौकशीत त्याने गुन्ह्याची कबुली दिली असून त्याच्याकडून चोरीचे पिस्तूल, जिवंत काडतुसे आणि इतर साहित्य जप्त करण्यात आले आहे. आरोपीला वांद्रे येथील स्थानिक न्यायालयात हजर करण्यात आले आहे. आता न्यायालयाने त्याला पोलीस कोठडी सुनावली आहे. या प्रकरणाचा पुढील तपास वांद्रे रेल्वे पोलीस करत आहेत.