Rana vs Kadu : राज्यातील शिंदे फडणवीस सरकारला पाठिंबा देणारे अपक्ष आमदार बच्चू कडू आणि रवी राणा यांच्यात गेल्या काही दिवासांपासून वाद सुरू आहे. या वादावर तोडगा काढण्यासाठी स्वत: मुख्यमंत्री एकनाथ शिंदे (Eknath Shinde) यांनी पुढाकार घेत दोघांनाही वर्षा बंगल्यावर चर्चेसाठी बोलावलं होतं. रविवारी रात्री तब्बल अडीच तास मुख्यमंत्री एकनाथ शिंदे यांनी बच्चू कडू आणि रवी राणा यांच्यासोबत चर्चा केली. मात्र अद्यापही या वादावर तोडगा निघाला नसून वाद कायम असल्याची माहिती आहे. (Bacchu Kadu News Today)

गुवाहटीला जाऊन कडू यांनी ५० खोके घेतल्याचा आरोप रवी राणा (Ravi Rana)  यांनी केला होता. त्यानंतर बच्चू कडू (Bacchu Kadu) प्रचंड आक्रमक झाले. दोघांमधील वाद इतका विकोपाला गेला की आमदार रवी राणा यांनी माझ्यावर केलेल्या आरोपांचे पुरावे सादर करावे, अन्यथा १ नोव्हेंबर रोजी मोठा खुलासा करणार असल्याची घोषणाही कडू यांनी केली.

मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांनी ५० खोके कुणी घेतले याबाबत खुलासा करावा, अशी मागणी बच्चू कडू यांनी केली. इतकंच नाही तर, माझ्यासोबत १२ आमदार असल्याचा इशाराही बच्चू कडूंनी दिला. दरम्यान, हा वाद दिवसेंदिवस वाढतच चालल्याने थेट मुख्यमंत्री एकनाथ शिंदे यांनी या वादावर मध्यस्थी केली.

मुख्यमंत्र्यांनी दोघांनाही रविवारी रात्री वर्षा बंगल्यावर चर्चेसाठी बोलावलं. शिंदेंनी रविवारी रात्री दोघांसोबतही तब्बल अडीच तास चर्चा केली. पण त्यामध्ये कोणताच ठोस निर्णय झाला नसल्याची माहिती आहे. दरम्यान, आज रवी राणा आणि बच्चू कडू हे ‘सागर’ बंगल्यावर उपमुख्यमंत्री देवेंद्र फडणवीस यांची भेट घेणार आहेत. या भेटीनंतर पत्रकार परिषद होण्याची शक्यता आहे. दरम्यान यावेळी काय घोषणा होणार याकडे सर्वांचं लक्ष आहे.

Edited By - Satish Daud