गणेशोत्सवाच्या तोंडावर डोंबिवली पश्चिमेतील फुले रोडवर असलेल्या प्रसिद्ध गणपती कारखान्यातील मूर्तिकार पळून गेल्याची घटना समोर आली आहे. उद्या म्हणजेच २७ ऑगस्ट रोजी गणपती बाप्पा सर्वांच्या घरात विराजमान होणार आहेत. मात्र घेतलेली ऑर्डर पूर्ण करता न आल्याने मूर्तिकार पळून गेल्याचं धक्कादायक कारण सामोर आलं आहे.

मिळालेल्या माहितीनुसार, आनंदी कला केंद्राच्या मूर्तिकाराने यंदा नेहमीपेक्षा अधिक ऑर्डर्स स्वीकारल्या होत्या. शहरात आणि आसपासच्या भागातून गणेश भक्तांनी मोठ्या संख्येने बुकिंग केल्यामुळे वर्कशॉपमध्ये प्रचंड कामाचा ताण निर्माण झाला. एकट्याने हे सर्व काम पूर्ण करणे अशक्य होत असल्यामुळे आणि दबाव हाताळता न आल्यामुळे मूर्तिकाराने पलायन केल्याचे समोर आले आहे.

या अचानक झालेल्या घडामोडीमुळे भाविकांमध्ये प्रचंड संतापाचे वातावरण आहे. बुकिंग करून पैसे दिलेल्या भाविकांना मूर्ती मिळाली नाही, तर काहींना जबरदस्तीने कारखान्यातून लहान-मोठ्या मूर्ती घ्याव्या लागल्या. काहींच्या हातात मात्र काहीच आले नाही, तर त्यांचे पैसे अडकले आहेत. त्यामुळे संतप्त भाविकांनी मूर्तिकाराविरोधात तीव्र नाराजी व्यक्त केली असून प्रशासनाने यात तातडीने हस्तक्षेप करावा अशी मागणी केली आहे.

पोलिसांनाही या प्रकरणाची माहिती देण्यात आली असून, डोंबिवली पोलीस घटनास्थळी दाखल झाले आहेत. मूर्तिकार नेमका कुठे गेला, त्याने पलायन का केले, याची सखोल चौकशी सुरू करण्यात आली आहे. गणेशोत्सव हा महाराष्ट्राचा सर्वात मोठा आणि भावनिक उत्सव मानला जातो. गणेशोत्सवाच्या केवळ काही तास आधी अशा प्रकारची घटना घडल्याने भक्तांची मोठी गैरसोय झाली आहे. दरम्यान, गणेश भक्तांनी मूर्तिकाराविरोधात आवाज उठवला असून, संबंधित घटनेची चौकशी करण्याची मागणी केली जात आहे.