>> सुरज मसुरकर

Bacchu Kadu On NDA Meeting: मुंबईत 31 ऑगस्ट आणि 1 सप्टेंबरला विरोधी आघाडी 'इंडियाची'ची तिसरी बैठक होणार आहे. यातच विरोधी आघाडीच्या या बैठकीला प्रत्युत्तर म्हणून आता एनडीएचीही बैठक होणार आहे. दोन्ही आघाडीची ही बैठक एकाच तारखेला मुंबईत होणार आहे, हे विशेष आहे. याच एनडीएच्या बैठकीचं निमंत्रण प्रहार संघटनेचे अध्यक्ष बच्चू कडे यांनाही मिळालं असल्याची माहिती त्यांनी दिली आहे. मात्र ते या बैठकीला उपस्थित राहणार नाही. याचं कारणही त्यांनी सांगितलं आहे.

याबाबत माहिती देताना बच्चू कडू म्हणाले की, ''१ तारखेला होणाऱ्या महायुतीच्या बैठकिचं नुकतच निमंत्रण मला मिळालं. पण त्यावेळेस दिव्यांग आपल्या दारीचा कार्यक्रम हा पूर्वनियोजित आहे. त्यामुळे मी त्या बैठकिस उपस्थित नसणार आहे.''

मी मंत्रीपदावरचा दावा सोडला

गेल्या अनेक दिवसांपासून बच्चू कडू यांचा मंत्रिमंडळात समावेश होणार असल्याची चर्चा आहे. मात्र या चर्चेला त्यांनीच आता पूर्णविराम दिला आहे. याबाबत बोलताना ते म्हणाले आहेत की, ''मला दिव्यांग मंत्रालय मिळालंय, त्यामुळे मी मंत्रीपदावरचा दावा आता सोडून दिलेला आहे. जे माझं स्वप्न होतं दिव्यांग मंत्रालयाचं, ते पूर्ण झालं. याहून अधिक काय हवं. देवाकडे मागितला एक डोळा त्याने दिले दोन डोळे.'' (Latest Marathi News)

स्पर्धा परीक्षेच्या गोंधळावर काय म्हणाले?

बच्चू कडू म्हणाले की, ''स्पर्धा परीक्षेच्या गोंधळाबाबत मुख्यमंत्री एकनाथ शिंदेंची भेट घेतली. उत्तराखंडच्या धर्तीवर आपल्याकडेही कडक कायदा याबाबत करायला हवा. जेणे करून पेपर फुटी व स्पर्धा परीक्षेतील गैर व्यवहाराला आळा बसेल.''

शेतकरी आंदोलनावर बोलताना ते म्हणाले, ''शेतकऱ्यांची सुरू असलेली आंदोलनं रास्त आहेत. पीकांना हमी भाव नसल्यावर तो तरी काय करेल. दुसरीकडे काल मंत्रालयात झालेले आंदोलनही जे धरणग्रस्त शेतकरी आहे, त्याचे इतके वर्ष प्रश्न मार्गी लागत नाही.''