Summary:

• पुण्यात एका तरुणाने बायकोच्या त्रासाला कंटाळून आत्महत्या केली

• इमारतीच्या चौथ्या मजल्यावरून उडी मारत आयुष्य संपवलं

• पुण्यातील वारजे माळवाडीमध्ये ही घटना घडली

• महिलेविरोधात गुन्हा दाखल करण्यात आला

पुण्यामध्ये कौटुंबिक वादातून एका तरुणाने आत्महत्या केल्याची घटना घडली. बायकोकडून वारंवार होणाऱ्या छळाला कंटाळून नवऱ्याने इमारतीवरून उडी मारत आयुष्य संपवलं. पुण्यातील वारजे परिसरात ही घटना घडली. या प्रकरणी वारजे माळवाडी पोलिस ठाण्यामध्ये आत्महत्या केलेल्या तरुणाच्या बायकोविरोधात गुन्हा दाखल करण्यात आला आहे. पोलिस सध्या या प्रकरणाचा तपास करत आहेत.

मिळालेल्या माहितीनुसार, महेश दत्तात्रेय क्षीरसागर (वय ४० वर्षे) असं आत्महत्या केलेल्या तरुणाचे नाव होते. महेश क्षीरसागर वारजे माळवाडी परिसरातील गिरीधरनगरमध्ये कुटुंबीयांसोबत राहत होते. त्यांनी इमारतीच्या चौथ्या मजल्यावरून उडी मारली. या घटनेत ते गंभीर जखमी झाले. त्यांना तात्काळ रुग्णालयात दाखल करण्यात आले पण डॉक्टरांनी त्यांना मृत घोषीत केले. महेश त्यांचे वडील दत्तात्रेय क्षीरसागर यांनी वारजे माळवाडी पोलिस ठाण्यात सुनेविरोधात तक्रार दाखल केली.

वारजे माळवाडी पोलिसांनी महेश यांच्या वडिलांनी दिलेल्या तक्रारीवरून त्यांची पत्नी प्रतिभा क्षीरसागर (वय ३५ वर्षे) हिच्याविरोधात आत्महत्येस प्रवृत्त केल्याप्रकरणी गुन्हा दाखल केला. पोलिसांनी सांगितले की, महेश क्षीरसागर यांचे १३ वर्षांपूर्वी प्रतिभासोबत लग्न झाले होते. लग्न झाल्यापासून महेश आणि प्रतिभा यांच्यात सतत वाद होत होते. याच त्रासाला कंटाळून महेश यांनी २ फेब्रुवारीला आत्महत्या केली. त्यांच्या वडिलांनी १६ फेब्रवारीला या प्रकरणी तक्रार दाखल केली. त्यानंतर गुन्हा दाखल करण्यात आला. पोलिस सध्या या प्रकरणाचा तपास करत आहेत.