Mill Workers News: मुख्यमंत्री एकनाथ शिंदे यांच्या अध्यक्षतेखाली गिरणी कामगारांच्या विविध प्रश्नासंदर्भात आज बैठक पार पडली. या बैठकीत गिरणी कामगारांच्या घरासंदर्भात चर्चा झाली. या बैठकीनंतर माध्यमांशी संवाद साधताना मुख्यमंत्री एकनाथ शिंदे यांनी महत्वाची माहिती दिली आहे.

ते म्हणाले आहेत की, गेल्या अनेक वर्षांपासून गिरणी कामगार घरापासून वंचीत आहेत. गिरणी कामगारांना घर आमचं सरकार नक्की देणार. गावाजवळ जे गिरणी कामगार घर घेण्यास तयार आहेत, त्यांना तसं दिलं जाईल.

5000 घरची लॉटरी निघणार

मुख्यमंत्री शिंदे म्हणाले, मुंबईतील अनेक प्रकल्प प्रलंबित आहेत. त्याला वेग दिला जाईल. एनटीसीच्या जागेवर धोरण बदलून घर कशी देता येतील याचा प्रयत्न केला जाईल. 5000 घरची लॉटरी लवकर काढू, असंही ते म्हणाले आहेत. (Latest Marathi News)

गिरणी कामगारांच्या वारसांना मिळणार नोकरी

मुख्यमंत्री इकनाथ शिंदे म्हणाले की, म्युझियमचं काम सुरु आहे. त्याठिकाणी गिरणी कामगारांच्या वारसांना नोकऱ्या देण्यात येतील. अशी चर्चा या बैठकीत झाली, अशी माहिती त्यांनी दिली.

दरम्यान, या बैठकीला मुंबई शहर पालकमंत्री दीपक केसरकर, मुंबई उपनगरचे पालकमंत्री मंगलप्रभात लोढा, खासदार धैर्यशील माने, राहुल शेवाळे, आमदार सर्वश्री कालिदास कोळंबकर, अतुल भातखळकर, सुनील राणे, प्रकाश आबिटकर, मंगेश कुडाळकर, प्रकाश आवाडे, माजी आमदार नरसय्या आडम, मुख्य सचिव मनोज सौनिक, महसूल विभागाचे अपर मुख्य सचिव राजगोपाल देवरा, गृहनिर्माण विभागाच्या अपर मुख्य सचिव वल्सा नायर, नगरविकास विभागाचे प्रधान सचिव असीम गुप्ता, गोविंदराज यांच्यासह गिरणी कामगार संघर्ष समितीचे पदाधिकारी उपस्थित होते.