कर्नाटकातील बेंगळुरूमधून धक्कादायक घटना उघडकीस आली आहे. लग्नाच्या रात्रीच नवरा आणि बायकोचं कडाक्याचं भांडण झालं. त्यानंतर या जोडप्याने वेगवेगळ्या दिवशी आत्महत्या केली. या घटनेने बेंगळुरूमध्ये खळबळ उडाली आहे.

लग्नानंतर सूरज शिवन्ना आणि गानवी हनिमूनसाठी श्रीलंकेला गेले होते. श्रीलंकेत असताना दोघांचं एकमेकांशी कडाक्याचं भांडण झालं. श्रीलंकेवरून घरी परतल्यानंतर काही दिवसांनी गानवीने बेंगळुरू येथील राहत्या घरी आत्महत्येचा प्रयत्न केला. तिला तातडीने रुग्णालयात दाखल करण्यात आले. मात्र, रुग्णालयात उपचारादरम्यान तिचा मृत्यू झाला.

गानवीच्या मृत्यूनंतर तिच्या आई-वडिलांनी नवऱ्याच्या विरोधात आत्महत्येस प्रवृत्त केल्याचा गुन्हा नोंदवला. गानवीच्या कुटुंबीयांचा दावा आहे की, '26 वर्षीय गानवीला घरी नेण्यासाठी आलो. त्यावेळी गानवीच्या सासरच्या लोकांनी अपमान केला. त्यांच्यामुळे लेकीने आत्महत्या केल्याचा दावा तिच्या कुटुंबीयांनी केला आहे.

तक्रारीत नवरा आणि त्याच्या कुटुंबातील सदस्यांनी हुंड्यासाठी छळल्याचाही आरोप केला. त्यानंतर त्यांच्या अटकेची मागणी करत गानवीच्या सासरच्या घरासमोर आंदोलन केलं. घरासमोर आंदोलन केल्यानंतर सूरजचे आई आणि वडील नागपूरला राहायला गेले. त्यानंतर शनिवारी सूरजने एका हॉटेलमध्ये आत्महत्या केली.

सूरजने आत्महत्या केल्याची माहिती मिळताच पोलिसांनी घटनास्थळी धाव घेतली. पोलिसांनी तातडीने त्याच्या मृतदेह ताब्यात घेत पोस्टमार्टमसाठी पाठवला. सूरजच्या आईने देखील आत्महत्येचा प्रयत्न केला. मात्र सूरजच्या आईचा जीव वाचला. मात्र, त्याच्या आईची प्रकृती गंभीर असल्याचेही सांगण्यात येत आहे. तिची रुग्णालयात मृत्यूशी झुंज सुरू आहे.

सूरज शिवन्ना आणि गानवीचं लग्न २९ ऑक्टोबर रोजी झालं होतं. दोघांनी लग्नात सात जन्म एकत्र राहण्याचं वचन दिलं होतं. परंतु दोघांचं नातं अवघ्या दोन महिन्यात संपुष्टात आलं. या दोघांनी आत्महत्या केल्याने नातेवाईक आणि परिसरात लोकांकडून हळहळ व्यक्त करण्यात येत आहे.