संजय गडदे, साम टीव्ही

मुंबईची जीवनवाहिनी असलेल्या लोकल ट्रेनमध्ये प्रवाशांच्या सुरक्षेसाठी तैनात असलेल्या होमगार्डनेच चक्क ऑन ड्युटी ट्रेन मॅनेजरला मारहाण केल्याची धक्कादायक घटना समोर आली आहे. 21 एप्रिलला रात्री 9.30 च्या सुमारास चर्चगेट - बोरिवली लोकलमध्ये हा प्रकार घडला. या घटनेमुळे रेल्वे कर्मचाऱ्यांच्या सुरक्षेचा प्रश्न पुन्हा एकदा ऐरणीवर आला आहे.

मिळालेल्या माहितीनुसार, सदर लोकल दादर स्थानकात असताना एक पुरुष होमगार्ड गाडीत चढला. त्यानंतर वांद्रे स्थानकात आणखी तीन होमगार्ड महिला डब्यात शिरले. हे चारही होमगार्ड सांताक्रूझ स्थानकावर महिला डब्याच्या दरवाजाजवळ उभे राहून प्रवाशांच्या चढ उतारात अडथळा निर्माण करत होते.

प्रवाशांची गैरसोय होऊ नये आणि सुरक्षितता जपली जावी या हेतूने ट्रेन मॅनेजर मालवदे यांनी त्यांना दुसऱ्या दरवाजाकडे उभे राहण्याची विनंती केली. मात्र या विनंतीचा राग धरून होमगार्ड मनोज सावंत याने उद्धटपणे 'हिरो बनू नकोस, 'आम्हाला शिकवू नकोस, असे म्हणत हुज्जत घातली.

विलेपार्ले स्थानकात राडा आणि मारहाण

हे प्रकरण एवढ्यावरच थांबले नाही. गाडी विलेपार्ले स्थानकाच्या प्लॅटफॉर्म क्रमांक 3 वर पोहोचताच संबंधित होमगार्डने आक्रमक पवित्रा घेतला. तुम्ही रेल्वे वाले काहीच नाही, आम्ही तुम्हाला लाथ मारून तुमची जागा दाखवू अशी धमकी देत त्याने मालवदे यांना शिवीगाळ केली. नाव विचारले असता संतापलेल्या मनोज सावंतने ट्रेन मॅनेजरला लाथ मारून शारीरिक मारहाण केली. या घटनेचा वेस्टर्न रेल्वे मजदूर संघाने (WRMS) तीव्र निषेध केला आहे. कर्तव्यावर असलेल्या कर्मचाऱ्याला अशा प्रकारे मारहाण होणे अत्यंत गंभीर असून, संबंधित होमगार्डवर तात्काळ एफआयआर (FIR) नोंदवून कठोर कारवाई करण्याची मागणी करण्यात आली आहे. आम्ही सीसीटीव्ही फुटेज तपासत असून दोषीवर कायदेशीर कारवाई केली जाईल, असे रेल्वे प्रशासनाकडून सांगण्यात आले आहे.