संघर्ष गांगुर्डे, कल्याण प्रतिनिधी

आधुनिक तंत्रज्ञानाचा गैरवापर करून रेल्वे पास बनविण्याचा प्रयत्न एका उच्चशिक्षित दाम्पत्याला चांगलाच महागात पडला आहे. एआयच्या मदतीने बनावट एसी लोकल पास तयार करून प्रवास करणाऱ्या अंबरनाथमधील पती-पत्नीला कल्याण रेल्वे पोलिसांनी अटक केली आहे.

घटना कल्याण स्थानकातील एसी लोकलमधील तपासणीदरम्यान समोर आली. एका महिला प्रवाशाला तिकीट तपासणीदरम्यान विशाल नवले नामक टीसीने पास दाखविण्यास सांगितले. तिने रेल्वेच्या यूटीएस अॅपमधील स्क्रीन दाखवली; मात्र तो पास संशयास्पद वाटल्याने टीसीने तत्काळ रेल्वे हेल्पलाईनवर कॉल करून त्या पासची पडताळणी केली. तपासात धक्कादायक बाब समोर आली पास ओम शर्मा या व्यक्तीचा असून, तो जानेवारी महिन्यात जारी केलेला आणि फेब्रुवारीमध्येच कालबाह्य झालेला होता.

महिलेने स्वतःचे नाव गुडिया शर्मा असल्याचे सांगितल्याने टीसीचा संशय अधिक गडद झाला. डोंबिवली स्थानकात तिला उतरवून आरपीएफ कार्यालयात चौकशी करण्यात आली. तेव्हा खरा खुलासा झाला तिच्या पतीने स्वतःच्या एसी लोकल पासवर एआयच्या सहाय्याने एडिट करून त्यावर पत्नीचे नाव व तपशील टाकत बनावट पास तयार केल्याचे मान्य केले.

या गंभीर फसवणुकीनंतर आरपीएफ आणि कल्याण रेल्वे पोलिसांनी दोघांविरुद्ध फसवणूक व बनावट कागदपत्र तयार केल्याप्रकरणी गुन्हा दाखल करून अटक केली आहे. पती एका मल्टिनॅशनल फायनान्स कंपनीत उच्च पदावर तर पत्नी नामांकित बँकेत मॅनेजर पदावर कार्यरत असल्याची माहिती मिळाली.

अंबरनाथमध्ये राहणाऱ्या या प्रतिष्ठित कुटुंबातील दाम्पत्याने काहीशा पैशांची बचत करण्यासाठी केलेल्या लबाडीचे गांभीर्य आता त्यांच्यावर ओढवले आहे. एआयचा दुरुपयोग किती गंभीर परिणाम घडवू शकतो, याचे हे ठळक उदाहरण ठरले आहे.