Pune Bhide Bridge flooded due to heavy rain : पुणे शहरात गेल्या दोन दिवसांपासून संततधार पाऊस पडत आहे. त्यामुळे नद्या-नाले ओसांडून वाहत आहेत. पुण्याला पाणी-पुरवठा करणारी धरणेही ९० टक्के भरले आहेत. मागील दोन तीन दिवसांपासून धरण पाणलोट क्षेत्रामध्ये मोठ्या प्रमाणावर पाऊस सुरू आहे. परिणामी खडकवासला धरणातून मिठा नदीत पाण्याचा विसर्ग देखील आता वाढवला आहे. रविवारी दुपारी खडकवासला धरणातून 14 हजार क्युसेक्सने पाण्याचा विसर्ग होता, तो आज सकाळी २२ हजारांवर गेला आहे. वादळी पावसामुळे पुण्यातील बाबा भिडे पूल पाण्याखाली गेला आहे. तसेच मुठा नदी पात्रातील रस्ता वाहतुकीसाठी बंद करण्यात आला आहे. बाबा भिडे पुलाजवळ सुरू असलेल्या मेट्रो पुलाच्या कामामुळे पूल वाहतुकीसाठी बंद आहे. मात्र पुण्यात समाधानकारक पाऊस झाला हे कसं ओळखायचं तर भिडे पूल पाण्याखाली गेला तरच होय, असं पुणेकर गंमतीने म्हणतात.

पुण्यात आजही पावसाची शक्यता -

मागील काही दिवसांपासून पुण्यात वादळी वाऱ्यासह मुसळधार पाऊस पडत आहेत. आज सकाळपासून पुणे शहरासह उपनगरात हलक्या पावसाने हजेरी लावली. आठवड्याचा पहिला दिवस असल्याने कामासाठी निघालेल्या पुणेकरांचे धावपळ झाली. पुणे शहरासह उपनगरात सकाळपासूनच पावसाची रिपरिप सुरू आहे. आज पुणे शहरात हलक्या ते मध्यम स्वरूपाचा पाऊस होणार असल्याची शक्यता हवामान विभागाने वर्तवली आहे.

पुण्यातील धरणं ९० टक्के भरली -

पुण्यातील जवळपास सर्व धरणं ९० टक्के भरली आहेत. काही दिवसांपासून पुण्यातील धरण पाणलोट क्षेत्रात पावसाची रिपरिप सुरू आहे. त्यामध्ये धरणाच्या पाणीसाठ्यात झपाट्याने वाढ झाली आहे. पुण्याला पाणी पुरवठा करणाऱ्या चार ही धरणे मिळून ९१ टक्के पाणीसाठा झाला आहे. मागील वर्षी आजच्या तारखेपेक्षा ९ टक्के जास्त पाणीसाठा आहे. खडकवासला आणि वरसगाव धरणातून पाण्याचा विसर्ग सध्या सुरू आहे. पुण्याला पाणी पुरवठा करणारे चार धरणे मिळून २६.६३ टी एम सी पाणी झाले आहे.

कुठल्या धरणात किती टक्के पाणीसाठा

खडकवासला: 77.07 टक्के

पानशेत: 92.68 टक्के

वरसगाव: 93.26 टक्के

टेमघर: 88.48 टक्के

पाण्याचा विसर्ग आणखी वाढवणार -

खडकवासाला धरणातून पाण्याचा विसर्ग आणखी वाढवणार आहे. सकाळी आठ वाजता २२ हजार १२१ क्युसेक्स वेगाने पाणी सोडण्यात आले आहे. धरण क्षेत्रात मुसळधार पाऊस असल्याने विसर्ग वाढवला आहे. यंदाच्या मोसमातील सर्वात जास्त विसर्ग होणार आहे. खडकवासला धरणाच्या सांडव्यावरून मुठा नदी पात्रामध्ये पाण्याचा विसर्ग सुरू आहे. पाण्याचा विसर्ग वाढल्याने मुठा नदीवरील अनेक पूल पाण्याखाली तर नदी पात्रातील रस्ता बंद आहे.