मुंबईत एकीकडे गणेश चतुर्थीची धुमाकूळ सुरु असताना मुंबईमध्ये एका २१ वर्षीय तरूणाला नव्याने जीवन मिळालं आहे. मुलुंडच्या फोर्टिस रूग्णालयामध्ये या २१ वर्षीय व्यक्तीवर हृदय प्रत्यारोपण शस्त्रक्रिया करण्यात आली. सहा महिन्यांपूर्वी प्रतिक्षा यादीमध्ये नाव नोंदवल्यानंतर एका १७ वर्षीय ब्रेनडेड तरूणामुळे या २१ वर्षीय तरूणाला जीवनदान मिळालं आहे.

तब्बल एका वर्षापूर्वी या २१ वर्षांच्या व्यक्तीला Restrictive Cardiomyopathy या हृदयाच्या आजाराचं निदान झालं होतं. हृदयाच्या या आजारामुळे हृदय कमजोर होऊ लागतं. या समस्येमध्ये रूग्णाला श्वास घेण्यास गंभीर त्रास होऊ लागला होता. शिवाय चालणं देखील त्याच्यासाठी कठीण झालं होतं. गेले काही दिवस तो रूग्ण अंथरूणाला खिळून होता.

अशातच 17 वर्षांच्या तरूणाचा रस्ते अपघात झाला आणि त्या तरुणाच्या कुटुंबाने अवयवदानासाठी दिलेली परवानगी एक चमत्कार ठरला. यावेळी नवी मुंबईमधील एका रूग्णालयात या ब्रेनडेड रूग्णाचं अवयवदान करण्यात आलं. त्यानंतर नवी मुंबई ते फोर्टिस हॉस्पिटल, मुलुंड अशा ग्रीन कॉरिडॉरने अवघ्या ३२ मिनिटांमध्ये हृदय पोहोचवण्यात आलं.

प्रत्यारोपणातील आव्हानांबद्दल सांगताना फोर्टीस रूग्णालयातील वरिष्ठ सल्लागार - बालरोग कार्डिओथोरॅसिक सर्जरी डॉ. धनंजय मालणकर म्हणाले, “या रूग्णासाठी नवीन हृदयाच्या प्रतिक्षेत होतो. रूग्णाला असलेल्या आजाराची परिस्थिती हाताळण्यासाठी आम्हाला अनेक औषधं द्यावी लागली. सध्या हृदय प्रत्यारोपण झालं असून रूग्ण आमच्या देखरेखीखाली आहे.”

या १७ वर्षीय तरूणाच्या वडिलांनी हृदयासोबत लिव्हर आणि किडनी देखील दान करण्याचा निर्णय घेतला. यामुळे एकूण ४ जणांचे प्राण वाचले. झोनल ट्रान्सप्लांट कॉर्डिनेशन सेंटरच्या माहितीनुसार, इतर अवयव बाकी रूग्णालयात दान केले गेलेत. यंदाच्या वर्षीचं हे ४१ वं अवयव दान होतं.