विकास मिरगणे, साम टीव्ही

मुंबई : मुंबईतील मध्य रेल्वे आणि हार्बर मार्गावर मेगाब्लॉक असल्याने लोकल ट्रेनवर मोठा परिणाम झालाय. मेगाब्लॉकमुळे लोकल ट्रेन सकाळपासून उशिराने धावत आहेत. लोकल उशिराने असल्याने प्रवाशांचे प्रचंड हाल होत आहेत. दुसरीकडे जोरदार पाऊस सुरु असल्याने काही ठिकाणी रुळावर पाणी साचल्याचं बोललं जात आहे. यामुळे प्रवाशांचे मेगा हाल होत आहेत. आता यात आणखी भर पडली आहे. हार्बर मार्गावरील वाहतूक तांत्रिक बिघाडामुळे विस्कळीत झाली आहे.

मिळालेल्या माहितीनुसार, साडे चार वाजल्यापासून नेरुळ स्टेशनजवळ रेल्वेची एक मशीन पडल्याने हार्बर आणि ट्रान्स मार्गावरील वाहतूक विस्कळीत झाली आहे. मात्र, हार्बर मार्गावर सीएसएमटी ते वाशी आणि पनवेल ते बेलापूर सेवा सुरू आहेत. तर ट्रान्स हार्बर मार्गावर ठाणे ते वाशी आणि ठाणे ते नेरळ सेवा सुरू आहेत.

नेरुळ ते पनवेल सेवा बंद आहेत. नेरुळ ते पनवेल मार्गावरील वाहतूक बंद झाल्याने प्रवाशांचे प्रचंड हाल होत आहेत. यामुळे हार्बर मार्गावरील काही रेल्वे स्टेशनवर प्रवाशांची प्रचंड गर्दी झाली आहे. तसेच रविवारच्या सुट्टीच्या निमित्ताने रेल्वे प्रवास करणाऱ्या प्रवाशांना मोठा फटका बसला आहे.

नेरुळ ते पनवेल सेवा बंद झाल्याने काही प्रवाशांनी रेल्वे ट्रॅकवरून प्रवास सुरु केला आहे. तर काही प्रवासी घरी पोहोचण्यासाठी पर्यायी मार्गाकडे वळाले आहेत. तर अनेक प्रवासी रेल्वे स्टेशनवरच लोकल सुरु होण्याची वाट पाहत आहेत.

दरम्यान, काही तासांपूर्वी नेरूळ रेल्वे स्टेशनजवळील उभ्या असलेल्या रेल्वेवर स्टंट करताना ओव्हरहेड वायरला हात लागल्यामुळे मुलगा गंभीर जखमी झाला. हा मुलगा कोपरखैरणे येथील रहिवासी असल्याचे समजते