पुण्याच्या हडपसर येथे एका सोसायटीमध्ये एका महिलेनं घरात ३००हून अधिक मांजरी पाळल्याचा प्रकार समोर होता. सोसायटी फॉर द प्रिव्हेन्शन ऑफ क्रुएल्टी ऑफ अ‍ॅनिमल्स (एसपीसीए) आणि महापालिकेचा पशुवैद्यकीय विभागातर्फे महिलेला नोटीस पाठवण्यात आली होती. त्यानंतर महिलेनं सर्व मांजरी खराडी येथील मालकीच्या जागेत हलवल्याची माहिती दिलीय. मात्र, खराडीतील जागा दाखवण्यास तिने नकार दिलाय. त्यामुळे मांजरी प्रकरणातील गूढ आणखी वाढलंय.

२ वर्षांपूर्वी ६० मांजरी पाळल्याबद्दल आणि त्यांची नोंदणी न केल्याबद्दल महिलेला नोटीस पाठवण्यात आली होती. महिलेनं नोटिशीला न जुमानता दोन वर्षांत आणखी मांजरींची भर घातली होती. त्यामुळं एसपीसीए आणि महापालिकेनं महिलेलं नोटीस पाठवली. यानंतर पाळीव मांजरांना खराडी येथील विशिष्ट ठिकाणी हलवण्याचे आदेश देण्यात आले.

त्यानंतर महिलेने पुठ्ठ्याच्या मोठ्या बॉक्समधून मांजरींना रात्रीच्या वेळी स्वत:च्या मालकीच्या खराडी येथील एक एकर मोकळ्या परिसरात हलवले. मात्र, तिने या जागेचे तपशील देण्यास नकार दिला आहे.एकीकडे एक ते दोन मांजरे पाळण्यासही अशक्य असताना दुसरीकडे मात्र इतक्या प्रमाणात ही मांजरे पाळण्याचे कारण काय? असा प्रश्न उपस्थित झालाय.

महापालिकेच्या पशुवैद्यकीय अधिकार्‍यांनी ही मांजरे पाळण्याचे नेमकं कारण काय, असा प्रश्न विचारला. त्या प्रश्नावर महिलेनं त्यामागचे निश्चित कारण सांगितलं नाही. दुसरीकडे स्थलांतरित जागेची माहिती देण्यास नकार दिला आहे. याबाबत महिलेला पुन्हा नोटीस दिली जाणार असल्याचं महापालिकेकडून सांगण्यात आलंय.