संजय गडदे, साम टीव्ही

मुंबई: अंधेरी पश्चिमेतील उस्मानिया डेअरीसमोरील साईबाबा सोसायटी परिसरात अंमली पदार्थ विक्रीच्या उद्देशाने MD (मेफेड्रोन) बाळगणाऱ्या सराईत गुन्हेगाराला दा. नौ. नगर पोलिसांनी अटक केली. फरदीन अल्ताफ शेख उर्फ मोगली असे अटक आरोपीचे नाव असून त्याच्याकडून ६१.९५ ग्रॅम मेफेड्रोन, अंदाजे ९ लाख २९ हजार २५० रुपये किमतीचा मुद्देमाल जप्त करण्यात आला.

पोलिसांनी दिलेल्या माहितीनुसार, १६ ऑगस्ट रोजी सकाळी ६.४१ वाजता साईबाबा सोसायटी, उस्मानिया डेअरीसमोर, अंधेरी पश्चिम येथे ही कारवाई करण्यात आली. फरदीन शेख उर्फ मोगली आणि त्याचा साथीदार सैफल्ला अल्लाबक्ष खान यांनी संगनमत करून प्रतिबंधित अंमली पदार्थाची वाहतूक, विक्री व व्यापार करण्याच्या उद्देशाने MD जवळ बाळगल्याचा आरोप आहे.

या प्रकरणी दा. नौ. नगर पोलीस ठाण्यात गुन्हा क्रमांक १०१०/२०२६ नुसार NDPS कायद्यातील कलम ८(क), २२(क), २९ तसेच भारतीय न्याय संहिता आणि महाराष्ट्र पोलीस कायद्यातील संबंधित कलमांनुसार गुन्हा दाखल करण्यात आला आहे. फरदीन शेख उर्फ मोगली याला १६ ऑगस्ट रोजी अटक करण्यात आली. त्याच्यावर यापूर्वीही मारहाण, शस्त्र बाळगणे, NDPS कायद्यांतर्गत अंमली पदार्थ बाळगणे तसेच महाराष्ट्र पोलीस कायद्यांतर्गत विविध गुन्हे दाखल असल्याचे पोलिसांच्या नोंदीवरून समोर आले आहे. त्याचा साथीदार सैफल्ला अल्लाबक्ष खान हा सध्या पाहिजे आरोपी असून त्याचा शोध सुरू आहे.

या कारवाईत वरिष्ठ पोलीस निरीक्षक सचिन गवस यांच्या मार्गदर्शनाखाली पोलीस उपनिरीक्षक जीवन डोईफोडे, सहायक फौजदार प्रशांत बोटे, पोलीस हवालदार ऋषीकेश बाबर तसेच पोलीस शिपाई अनिल जतकर, सागर माने आणि संग्राम पात्रे यांच्या पथकाने सहभाग घेतला. रात्रपाळी पर्यवेक्षक म्हणून पोलीस निरीक्षक खोंद्रे यांनी देखरेख केली. प्रकरणाचा पुढील तपास पोलीस उपनिरीक्षक डोईफोडे करीत आहेत.