Gautam Adani Meets Raj Thackeray : मागील काही दिवसांत राज्यातील अनेक महत्वाचे प्रकल्प बाहेर गेल्याने आरोप-प्रत्यारोप केले जात आहेत. विरोधकांनी यावरून सरकारला चांगलंच धारेवर धरलंय. आता हे प्रकल्प राज्यात आणण्यासाठी शिंदे फडणवीस सरकारने प्रयत्न सुरू केले आहे. दरम्यान, अदाणी समुहाचे प्रमुख गौतम अदानी यांनी मंगळवारी रात्री मनसे प्रमुख राज ठाकरे यांची भेट घेतली. राज ठाकरे यांचं निवासस्थान असणाऱ्या ‘शिवतीर्थ’ येथे ही भेट झाली आहे.

या भेटीत दोघांमध्ये जवळपास अर्धा तास चर्चा झाली. गौतम अदानी यांनी अचानक राज ठाकरे यांची भेट घेतल्याने तर्क वितर्क लावले जात आहे. कारण, अदाणी यांच्या भेटीनंतर राज ठाकरे यांनी लगेचच उपमुख्यमंत्री देवेंद्र फडणवीस यांची भेट घेतल्याची माहिती सूत्रांनी दिली आहे. यापूर्वी गौतम अदानी यांनी मुख्यमंत्री एकनाथ शिंदे, उद्धव ठाकरे तसेच भाजपचे नेते आशिष शेलार यांची भेट घेतली होती, त्यानंतर त्यांनी आज राज ठाकरे यांची भेट घेतली आहे.

सूत्रांच्या माहितीनुसार, धारावी डेव्हलपमेंटचा मुंबईमधील मोठा प्रोजेक्ट अदानी यांच्या कंपनीला मिळाला आहे. त्यामुळे या प्रकल्पाच्या अनुषंगाने येणाऱ्या अडचणींवर तोडगा काढण्यासाठी अदाणी हे राज्यातील नेत्यांच्या भेटी घेत आहेत, असे सांगितले जात आहे. पण गौतम अदाणी आणि राज ठाकरे यांच्यात नेमकी काय चर्चा झाली? याची अधिकृत माहिती अद्याप समोर आली नाही.

Edited By - Satish Daud