अभिजित देशमुख, साम टीव्ही, कल्याण प्रतिनिधी

कल्याण पूर्व विधानसभा मतदारसंघातील शिवसेना शिंदे गट भाजपमध्ये सुरू असलेल्या शीत युद्धाचा फायदा घेत काँग्रेसने या मतदारसंघात तयारी सुरू केल्याचे पाहायला मिळत आहे. महाविकास आघाडीकडून हा मतदारसंघ काँग्रेसला मिळावा यासाठी काँग्रेसच्या स्थानिक पदाधिकाऱ्यांकडून हालचाली सुरू झाल्यात.

कल्याण पूर्व विधानसभा मतदारसंघात महाविकास आघाडीतून शिवसेना ठाकरे गटाचा दावा असणार आहे. त्याचवेळी आता काँग्रेसने देखील दावा केल्याने या मतदारसंघाबाबत महाविकास आघाडीत पेच निर्माण होण्याची शक्यता आहे. त्यापाठोपाठ काँग्रेस जिल्हाध्यक्ष सचिन पोटे यांच्या वाढदिवसानिमित्त कल्याण पूर्वेत भावी आमदार अशा आशयाचे बॅनर लागल्याने राजकीय वर्तुळात अनेकांच्या भुवया उंचावल्या आहेत.

लोकसभा निवडणुकीनंतर आता विधानसभेच्या तयारीला सर्वच पक्ष लागलेले आहेत. यात महाविकास आघाडी मधील काँग्रेसला चांगलं यश आल्याने विधानसभा निवडणुकांसाठी अनेक मतदारसंघात काँग्रेसमधून इच्छुक आपल्या गुडघ्याला बाशिंग बांधून उभे असल्याचे चित्र दिसून येत आहे.

यातच महायुतीच्या अंतर्गत वादातील विधानसभा म्हणजे कल्याण पूर्व विधानसभेत भाजप आमदार गणपत गायकवाड शिवसेना शिंदे गटातील शहर प्रमुख महेश गायकवाड यांच्यावर पोलीस ठाण्यात गोळीबार केल्याने तुरुंगात आहे. मात्र यानंतर कल्याण पूर्व येथील शिवसेना व भाजप यांचा अंतर्गत वादाचा फायदा यावेळेस नक्कीच कल्याण पूर्व येथील महाविकास आघाडीला होणार असून कल्याण पूर्व विधानसभेसाठी काँग्रेसचे जिल्हा अध्यक्ष सचिन पोटे यांनी आमदारकी लढवणार असल्याचे सांगितले होते.

यानंतर आज त्यांच्या वाढदिवसानिमित्त कल्याण पूर्वेत कार्यकर्त्यांकडून शुभेच्छा देणारे मोठ्या प्रमाणात बॅनर लागले असून या बॅनरवर सचिन पोटे भावी आमदार, असा उल्लेख करत बॅनरबाजी करण्यात आली आहे. यामुळे काँग्रेस कल्याण पूर्व विधानसभा मतदारसंघात मोर्चेबांधणी सुरु केली असल्याची राजकीय वर्तुळात चर्चा आहे. तर दुसरीकडे ठाकरे गटाकडून देखील कल्याण पूर्व मतदारसंघावर दावा करण्यात आलाय. त्यामुळे या जागेवरून महाविकास आघाडीसमोर पेच निर्माण होण्याची शक्यता आहे.