मुंबई : १०० कोटी खंडणी प्रकरणातील मुख्य आरोपी सचिन वाझेने अनिल देशमुख यांच्या गंभीर आरोप केल्याने राजकीय वर्तुळात खळबळ उडाली आहे. अनिल देशमुख हे पीएच्या माध्यमातून पैसे घ्यायचे, त्याचे पुरावे सीबीआयकडे दिल्याचे सचिन वाझेने म्हटलं. याबाबत गृहमंत्री देवेंद्र फडणवीस यांना पत्र लिहिल्याचेही सचिन वाझेने सांगितले. या पत्रात जयंत पाटील यांचंही नाव असल्याचं सचिन वाझे याने म्हटलं आहे. अंटेलिया, मनसुख हिरेन आणि १०० कोटी प्रकरणातील मुख्य आरोपी सचिन वाझेच्या आरोपांमुळे राजकारणात भूकंप येणार असल्याची चर्चा राजकीय वर्तुळात रंगली आहे.

सचिन वाझेला वैद्यकीय चाचणीसाठी जे जे रुग्णालयायत नेताना त्याने माध्यमांना माहिती दिली. १०० कोटी प्रकरणातील मुख्य आरोपी निलंबित पोलीस अधिकारी आणि तुरुंगात असलेला सचिन वाझेने अनिल देशमुख यांच्यानंतर जयंत पाटील यांच्यावर बोट केलं आहे. काही दिवसांपूर्वी अनिल देशमुख यांनी समित कदम आणि देवेंद्र फडणवीस यांच्यावर आरोप केले होते. 'मला ईडीच्या कारवाईपासून वाचण्यासाठी कथित ऑफर ही देवेंद्र फडणवीस यांच्याकडून समित कदम घेऊन आला होता, असा आरोप देशमुखांनी केला होता.

अनिल देशमुखांनी आरोप केल्यानंतर १० दिवसातच नवा ट्विस्ट निर्माण झाला आहे. सदर प्रकरणात समित कदम यांच्यानंतर जयंत पाटील यांचे नाव चर्चेत आले आहे. वाझेने जयंत पाटील यांच्यावर आरोपाचा ठपका ठेवल्याने नवा वाद समोर निर्माण झाला आहे. दोन महिन्यात येणाऱ्या विधानसभा निवडणुकाही वाझे प्रकरणामुळे राजकीय वातावरण तापण्याची शक्यता आहे.

सचिन वाझेने लिहिलेल्या पत्रात अनिल देशमुख यांच्यासहित जयंत पाटील यांच्या नावाचाही समावेश असल्याचे कळत आहे. जयंत पाटील यांच्यासहित इतर नेत्यांचेही नावे असल्याची माहिती समोर येत आहे. सचिन वाझेने गृहमंत्री देवेंद्र फडणवीस यांना लिहिलेल्या पत्रात जयंत पाटील यांच्या विरोधात काय आरोप केले, हे अद्याप समोर आलेले नाही.

जयंत पाटील यांच्यासहित या पत्रात इतर कोणत्या नेत्यांची नावे आहे का, हे देखील कळू शकलेले नाही. सचिन वाझेच्या देवेंद्र फडणवीसांना लिहिलेल्या पत्रामुळे राजकारणात खळबळ उडण्याची शक्यता आहे. वाझेने देवेंद्र फडणवीसांना लिहिलेलं पत्र अद्याप हाती लागलेलं नाही. सचिन वाझेच्या आरोपानंतर राजकीय नेत्यांच्या प्रतिक्रिया उमटू लागल्या आहेत.