Tukaram Mundhe News राज्यातून मोठी बातमी समोर आली आहे. अन्नसुरक्षा आयुक्त तुकाराम मुंढे यांनी पदभार हातात घेतल्यापासून राज्यातील अन्नात भेसळपासून ते अगदी गुटखा, दारू विक्री करणाऱ्या दुकानदार आणि हॉटेल चालकांना सळो की पळो करून सोडलं. यानंतर आता मुंढे यांनी मुंबईत धडक कारवाई करत अन्नसुरक्षा नियमांचे गंभीर उल्लंघन करणाऱ्या मुंबईतील सहा हॉटेल्स, बेकरी आणि क्लब यांच्यावर कठोर कारवाई करत त्यांचे अन्न व्यवसाय परवाने निलंबित केले आहेत. राज्यभर राबवण्यात आलेल्या विशेष तपासणी मोहिमेदरम्यान अस्वच्छता, मुदतबाह्य अन्नपदार्थांची विक्री, चुकीच्या माहितीची लेबल, कीटकांचा वावर आणि आवश्यक कागदपत्रांचा अभाव अशा अनेक गंभीर त्रुटी आढळून आल्या.

अन्नसुरक्षा आयुक्त तुकाराम मुंढे यांच्या निर्देशानुसार ही विशेष मोहीम राबविण्यात आली. या मोहिमेत राज्यातील ३१ ठिकाणी छापे टाकण्यात आले. तपासणीदरम्यान ३४ लाख ८७ हजार ६०३ रुपयांचा प्रतिबंधित गुटखा, पानमसाला आणि इतर अन्नपदार्थांचा साठा जप्त करण्यात आला. तसेच प्रतिबंधित अन्नपदार्थांची विक्री, वाहतूक आणि वितरण करणाऱ्या १९ जणांना अटक करण्यात आली आहे. या कारवाईत एका आस्थापनेला दुकानाला करण्यात आले असून तीन वाहनेही जप्त करण्यात आली आहेत.

मुंबईतील विविध भागांमध्ये करण्यात आलेल्या तपासणीत अनेक धक्कादायक बाबी समोर आल्या. नरीमन पॉइंट येथील ‘फ्लिंट अँड वार्सा’ या हॉटेलमध्ये चुकीच्या माहितीचे लेबल असलेले अन्नपदार्थ आढळून आले. तसेच मुदतबाह्य अन्नपदार्थ तात्काळ नष्ट करण्यात आले. बोरिवली येथील एका बेकरीमध्ये दुरुस्तीचे काम सुरू असतानाच अन्न उत्पादन सुरू असल्याचे निदर्शनास आले. याशिवाय तेथे मोठ्या प्रमाणावर अस्वच्छता आढळली.

भांडुप, सांताक्रूझ, अंधेरी आणि वांद्रे येथील काही हॉटेलमध्येही स्वच्छतेचा अभाव, झुरळे व उंदरांचा वावर अन्नसुरक्षा नियमांचे अपुरे पालन तसेच ग्राहक तक्रार निवारण यंत्रणेतील गंभीर कमतरता आढळून आल्या. या सर्व बाबी ग्राहकांच्या आरोग्यासाठी धोकादायक असल्याचे FDAने स्पष्ट केले. अन्न व औषध प्रशासनाने संबंधित हॉटेलना नियमांचे काटेकोर पालन करण्याचे निर्देश दिले असून भविष्यातही अशा विशेष मोहिमा सुरू राहणार असल्याचा इशारा दिला आहे. ग्राहकांच्या आरोग्याशी तडजोड करणाऱ्यांविरोधात कठोर कारवाई सुरूच राहील, असे प्रशासनाने स्पष्ट केले आहे.